Ilahn 33 - Uwumbɔr aagbaŋ

Kipak aalahn

¹ Nimi bi aabimbin ŋan na, di mpopiin teen mpɔɔn pu man, Uwumbɔr aah ŋa pu tii nimi na pu. Nimi bi mɔmɔk keei waamɔb na, pak u man.

² Di tibar doon Uwumbɔr man, di ikuŋmin aawangbaakaan gaa ilahn tii u man.

³ Gaa nlahnpɔɔn tii u man, di nwanyim gbaa kibeek ngbaan man, ki li tar ni mpopiin.

⁴ Uwumbɔr aamɔbon gbii la, le aa ga ŋmaa nyii waatun pu ki sil.

⁵ Uwumbɔr gee lituln li ŋan ki bi chob na la; kitiŋ kee pu ye waageehm mu bi n‑yoonn mɔmɔk na ŋmeen la.

⁶ Uwumbɔr len, le paacham naan, le ki ki len, le nwiin, ni uŋmal, ni iŋmabi naan.

⁷ U kuun nnyusakpem mɔmɔk ti kpaan libubaan ni; le ki di nnyusakpem aanyonyoon laŋ libubaan ni.

⁸ Kitiŋ kee mɔmɔk, li san Uwumbɔr ijawaan. Dulnyaa aanib mɔmɔk, nyuŋ u man.

⁹ U nan di umɔb le len, le dulnyaa naan; le waamɔboln cha tiwan mɔmɔk nyan ni.

¹⁰ Uwumbɔr bii ŋinibol aalandak la; u cha baa ŋmaa tun baah ba dak pu na.

¹¹ Le uma aalandak bi n‑yoonn mɔmɔk; waalandak aa kpa ndoon.

¹² Litimbol li dii Tidindaan Uwumbɔr na, lima le kpa mpopiin; waah lee binib bi ke bi ye uyaab na, bima le kpa mpopiin.

¹³ Uwumbɔr bi paacham le ki lik waa unibɔn mɔmɔk.

¹⁴ Waah bi nin chee ki joo dulnyaa na, le u lik ni taab ki waa binib bi mɔmɔk bi kitiŋ kee pu na.

¹⁵ Uma le naani baalandak mɔmɔk, le ki nyi baah tun pu na mɔmɔk.

¹⁶ Naa ye ubɔr aajab bi pɔɔ na pu le ubɔr nyaŋni butɔb ni, kaa ye butɔb aaja aapɔɔn pu le u mu nyaŋni butɔb ni.

¹⁷ Butɔb aataan aan ŋmaa cha binib nyaŋ baadim, yaapɔɔn aan ŋmaa gaa ubaa lii.

¹⁸ Uwumbɔr lik binib bi keei waamɔb ki tii waageehm mu bi n‑yoonn mɔmɔk na naadii na pu la.

¹⁹ U nyani bi nkun ni; le ki kpiini bi nkon aayoonn.

²⁰ Ti di timi aamakl ŋa Uwumbɔr aaŋaal ni la; uma le ye u kii timi ki ter timi na.

²¹ Uma pu le tisui piin, ti tii waayimbil li bi chain na naadii.

²² Uwumbɔr, ti di timi aamakl ŋa aaŋaal ni la, cha saageehm mu bi n‑yoonn mɔmɔk na li bi ti chee.