Ilahn 32 - Uwumbɔr aagbaŋ

Titunwanbir aakpiirn pu ni chapinn

¹ Binib bi Uwumbɔr di cha pinn baatunwanbir na le kpa mpopiin, Uwumbɔr aah di cha binib bi aataani pinn bi na le kpa mpopiin.

² Binib bi Uwumbɔr aan len ke baabɔr bii na, ni binib bi kaa gee inyamɔn na, bima le kpa mpopiin.

³ Maah kaa nan kpiir maatunwanbir na, iwiin mɔmɔk aawiil le nan cha nwon kpo,

⁴ Uwumbɔr, aa nan dar ntafal nwiin pu ni kinyeek; le maapɔɔn doo, ke limaln aah kuur lipeel aatotoŋ chee pu na.

⁵ Le m kpiir maatunwanbir tuk si, maa nan di maataani bɔr si. M nan kii ki kpiir ti tuk si, le aa di cha maatunwanbir pinn mi.

⁶ Kina na, binib bi mɔmɔk kii saamɔb na yaa bi tibɔr ni kan, bi mee si; le tibɔr yaa choo bi chee ke nwam na kan, ti taa pii bi.

⁷ Sin le ye maabɔbɔryaan; aa ga nyan mi tibɔr ni. M gaa ilahn mpɔɔn pu, saah gaal mi lir pu na, ba pu? sin le kii mi.

⁸ Uwumbɔr bui ke, “M ga mɔk si nsan mu aa ga dii na; m ga mɔk si le ki lik si.

⁹ Taa li kpa kijɔrk ke utaan bee ubon u bi ga di itangar ni iŋmin ŋa umɔb ni ke u dii nsan.”

¹⁰ Bibiindam ga ji falaa, le Uwumbɔr ga li kii binib bi tii u naadii na ki tii bi waageehm mu bi n‑yoonn mɔmɔk na.

¹¹ Nimi bi ye bininyaam na, cha nisui li piin aan ni li mɔɔni, Uwumbɔr aah ŋa pu tii nimi na pu. Nimi bi kii waamɔb na, li tar man mpopiin pu.