Ilahn 31 - Uwumbɔr aagbaŋ

Limeel li ga tii Uwumbɔr naadii na

¹ Uwumbɔr, m dan aa chee, ki ban ke aa li kii mi la; taa cha bi nyaŋ mi daalbaadaal. Aa ye Uwumbɔr u ŋani ni ŋan na, m mee si, gaa mi lii.

² Pel m chee. Gaa mi lii dandana. Li ye u ga li kii mi na; li ye u ga gaa mi lii na.

³ Sin le ye u kii mi na; loln m pu nsan, saah nan puu ke aa ga mɔk mi maah ga dii pu na pu.

⁴ Nyan mi gaawɔb u bi di pen mi na ni; li kii mi linimaln chee.

⁵ M di mbaa ŋa aaŋaal ni la. Uwumbɔr, sin le ga gaa mi lii; aa ye Uwumbɔr u ŋani saah len pu na la.

⁶ Saa gee binib bi dooni ŋiwaa na, le mma tii si naadii.

⁷ Saageehm mu bi n‑yoonn mɔmɔk na pu le nsui ga li piin, le m mɔɔni. Aa kani maafalaa, ki nyi maah bi tibɔr ti ponn ni na.

⁸ Saa cha maadim nyaŋ mi ki chuu mi, aa tii mi nsan ke m buen maah gee nimɔk na.

⁹ Uwumbɔr, san mi kinimbaak, ba pu? m bi tibɔr ni la; maah wii sakpen pu na le nnimbil wu, nwon mɔmɔk kpo la.

¹⁰ Mpombiin pu le nwon yɔl, le iwiil gii maamɔfal pu. Nwon yɔl maabɔbir mɔmɔk pu la, hali maakpab bi dur la.

¹¹ Maadim mɔmɔk, ni binib bi koo gbɔk mi na lik seeni mi la; binib bi nyi mi na yaa kan mi kitiŋ ponn ni kan, bi san mi ijawaan, le ki san.

¹² Unii mɔmɔk suln m bɔr ke maah kpo le na; m naahn tiwan ni bi di mee na la.

¹³ M ŋun maadim looni ki len; tibɔbir le mann goln mi. Bi bi ban isan m pu la, bi kpokl ke bi ku mi la.

¹⁴ Uwumbɔr, le m tii si naadii; sin le ye Maawumbɔr.

¹⁵ N‑yoonn mɔmɔk m bi aaŋaal ni la; nyan mi maadim aaŋaal ni, nyan mi binib bi ban bi ku mi na aaŋaal ni.

¹⁶ Li kpa mi saatutunn pu tiŋann. Di saageehm mu bi n‑yoonn mɔmɔk na gaa mi lii.

¹⁷ Uwumbɔr, m yin si la; taa cha m ji inimɔɔn. Cha titunwanbirdam ma ji inimɔɔn, cha bi sunn kitekpiitiŋ ni aan ubaa taa ŋun bi pu.

¹⁸ Ŋmin binyamɔndam aafuuk, ŋmin bigaadam ni bimakdam bi len bininyaam bɔfam na aafuuk.

¹⁹ Saah ŋa tiwan ni tii binib bi nyuŋ si na kpa iwaan. Unii mɔmɔk nyi saah ŋan pu na, ki nyi saah kii binib bi tii si naadii na pu na.

²⁰ Saah bi bi chee pu na, le binib bi kpokl bi pu na aa ŋmaa pii bi; aa joo bi bɔrni mbɔbɔr mu ŋan na ni la, le baadim aasiibil aa piir bi.

²¹ Pak Uwumbɔr man. Baah nan gob mi ki tak mi na le u nan mɔk mi ngeehm mu nyaŋ sakpen na.

²² M nan san ijawaan ki bui ke u jenn nyan mi unimbiin ni la. Le buyoonn m yin u ki ban nterm na, u ŋun maawiil.

²³ Uwumbɔr aanib bi dii u mbamɔm na mɔmɔk, li gee u man. Uwumbɔr kii binib bi dii u mbamɔm na la, le ki dar bigaadam aatafal baah ŋeer pu na.

²⁴ Nimi bi mɔmɔk kpa Uwumbɔr pu limakl na, cha nitaakpab pɔɔk, nyal sil man.