Ilahn 30 - Uwumbɔr aagbaŋ

Idoon aameel

¹ Uwumbɔr, m pak si, ba pu? aa gaa mi lii, kaa cha maadin aasui piir m pu.

² Ndindaan Uwumbɔr, m wii yin si ki ban nterm, le aa tii mi laafee;

³ aa nyan mi likaakul ni; m nan bi nsan ni ki cha kitekpiitiŋ ni taab, le aa ki giin ni mi.

⁴ Uwumbɔr aanib bi dii u mbamɔm na, gaa ilahn ki pak u man. Teer man U bi Chain na aah ŋa pu na, ki doon u man.

⁵ Waaŋuul aa fiir ni yunni, le waaŋann ma aa kpa ndoon. Iwiil ga li bi kinyeek, le kichakpiik ni nan kpaln mpopiin.

⁶ M nan kan mbaa le ki bui ke, “Ubaa aan ki ŋmaa nyaŋ mi.”

⁷ Uwumbɔr, aa nan kpa m pu tiŋann; aa nan kii mi ke lijool pu aatiŋ ki kpa mpɔɔn na la. Tɔ, le aa nan ki di aabaa bɔr mi, le ijawaan chuu mi.

⁸ Uwumbɔr, m yin si, m gaŋ si ki ban nterm:

⁹ “M yaa kpo kan, ba aanyoor aa ga kan? M yaa kun bitekpiido kan, ba aanyoor aa kan? Binib bi kpoi na ga ŋmaa pak si ii? Bi ga ŋmaa di saaŋann ti kaa door na moon aa?

¹⁰ Uwumbɔr, pel m chee, ki san mi kinimbaak. Uwumbɔr, ter mi.”

¹¹ Aa kpeln maasuubiin ŋa mpopiin aawaal; aa chuu nyan maasuubiin m chee, ki di mpopiin gob mi.

¹² Kina pu na, maan li ŋmin, m ga gaa ilahn ki pak si. Uwumbɔr, sin le ye Maawumbɔr, m ga li dooni si n‑yoonn mɔmɔk.