Ilahn 29 - Uwumbɔr aagbaŋ

Uwumbɔr aaneel mu bi kitaabuŋ ni na

¹ Nimi paacham yaab, pak Uwumbɔr man, pak waapɔɔn ni waanyuŋ man.

² Pak Uwumbɔr aayimbil li kpa kipak na man. Peen tiwanpeenkaan ni ye chain na, ki li dooni u man.

³ Bi ŋun Uwumbɔr aaneel nnyusakpem pu; Uwumbɔr u kpa kipak na tar ke utaal na, le uneel ti keei nnyusakpem ni.

⁴ Bi ŋun Uwumbɔr aaneel mu pɔɔ ki nyuun na pu.

⁵ Uwumbɔr aaneel kool ŋikpan aasui la, hali ŋikpan aasui i bi Lebanonn aatiŋ ni na mu kool la.

⁶ U cha Lebanonn aajoo yukr ke inaabi na la, ki cha Hemonn aajoo yukr ke unaajabo na.

⁷ Uwumbɔr aaneel cha utaal moor la.

⁸ Waaneel cha nteersakpiin aatiŋ jii la; u damni Kades aateersakpiin aatiŋ mu.

⁹ Uwumbɔr aaneel cha isui jii la, le ki cha isui mɔmɔk aafar gbar lir; le binib bi mɔmɔk bi Waadichal ni na tar ke, “Pak Uwumbɔr man.”

¹⁰ Uwumbɔr le joo nnyun mu nyoo na, u ye ubɔr n‑yoonn mɔmɔk la.

¹¹ Uwumbɔr le tii waanib mpɔɔn, ki ŋani tinyoor ŋani bi pu, ki tii bi nsuudoon.