Ilahn 28 - Uwumbɔr aagbaŋ

Limeel li ban nterm na

¹ Uwumbɔr, maakikiir, m yin si la; ŋun maawiil pu. Aa yaa kaa gar mi kan, m ga dii binib bi sunni cha bitekpiido na.

² M yaa wii yin si ki ban nterm, ki yoor ŋŋaal mɔk Saadichal li bi chain na kan, pel m chee.

³ Aa yaa ban aa bii bibiindam, ni binib bi tun titunwanbir aan baamɔliin naahn kijɔtiik ki mu tee kpa kinanaŋ bisui ni na kan, taa di mi kpaan bi chee.

⁴ Daa bitafal baah tun titunwanbir ti na pu. Daa bitafal baatun mɔmɔk pu, tiin bi baah ŋeer pu na.

⁵ Baa dakl lik Uwumbɔr aah tun pu na, ni waah naan tiwan ni na; kina pu le u ga daa bitafal ki kuln bi kookoo.

⁶ Di kipak tii Uwumbɔr, ba pu? u ŋun maah wii ki ban nterm pu na.

⁷ Uwumbɔr kii mi le ki lik mi; le m di naadii tii u. U tii mi nterm ki piir nsui; m joo mpopiin aalahn le pak u.

⁸ Uwumbɔr kii waanib la; u ter waah lee ubɔr u na, le ki gaal u lir.

⁹ Uwumbɔr, gaa saanib lii, ki ŋa saanyoor ŋa saah yeh binib bi na pu, ki li ye u kpaa bi ki lik bi pu n‑yoonn mɔmɔk na.