Ilahn 27 - Uwumbɔr aagbaŋ

Kipak aameel

¹ Uwumbɔr le ye maawiihn, uma le gaal mi lir; Maan san ubaa ijawaan. Uwumbɔr kii mi le ki nyani mi linimaln mɔmɔk ni; maan li san ijawaan kpala.

² Bibiindam yaa tak mi ki pɔɔni bibaa ke bi ku mi kan, bi gbeer le ki lir.

³ Hali bijab lichur yaa gob mi kan, maan li san ijawaan; hali bidim yaa tak mi kan, m ga li beenin mak Uwumbɔr pu la.

⁴ M mee Uwumbɔr tiwan nibaa la; tiwan nibaa baanja le m ban, ke m li bi Uwumbɔr Aadichal ni n‑yoonn mɔmɔk ki mee u, u mɔk mi waasan, aan waaŋann li ye iwaan aawan m chee.

⁵ Tibɔr aayoonn kan, u ga li bii m pu; u ga li kii mi Waadichal ni, ki cha m kal litakpal li paa na pu,

⁶ aan m kan linyaŋ maadim bi mann goln mi na pu. M ga di mpopiin aafuuk toor kitork Waadichal ni; M ga gaa ilahn, m ga pak Uwumbɔr.

⁷ Uwumbɔr, m yaa yin si kan, kii mi. San mi kinimbaak ki gar mi.

⁸ Saah nan bui ke, “Dan ki nan doon mi” na, m nan gar ke, “Uwumbɔr, m ga dan;” taa di aabaa bɔr mi.

⁹ Uwumbɔr u gaal mi lir na, taa gee liŋuul m pu; m ye saatutunn la, taa jenn mi aa chee. Sin le ter mi; taa di mi lii, taa siir cha mi.

¹⁰ Nibaakan nte ni nna ga di mi lii, le Uwumbɔr ma ga li joo mi.

¹¹ Uwumbɔr, mɔk mi saah ban ke m ŋa pu na, ki mɔk mi limɔfal aasan, ba pu? m kpa bidim pam.

¹² Taa di mi lii aan maadim bi joo inyamɔn ni nfaan tak mi na pii mi.

¹³ M nyi ke m ga li bi limɔfal ni le ki ti kan Uwumbɔr aaŋann buyoonn m bi din wee aabimbin ni na.

¹⁴ Di naadii tii Uwumbɔr. Li kpa gaakii, taa cha aataakpab yɔl; di naadii tii Uwumbɔr.