Ilahn 25 - Uwumbɔr aagbaŋ

Nsan aamɔkm, ni nkikiirn aameel

¹ Uwumbɔr, sin le m joo maameel tii,

² Maawumbɔr, sin le m gaa ki kii. Taa cha m ji inimɔɔn; taa cha maadim nyaŋ mi.

³ Binib bi kpa gaakii tii si na aa lir, le binib bi nya aapuwɔb mala na ma lir la.

⁴ Uwumbɔr, mɔk mi saasan, cha m bee i.

⁵ Mɔk mi aan m li bi ke saabamɔn aah ban pu na, ba pu? sin le ye Maawumbɔr u gaal mi lir na. M ga li kpa gaakii tii si n‑yoonn mɔmɔk.

⁶ Uwumbɔr, teer saaŋann, ni n‑yoonn mɔmɔk aageehm mu aa di mɔk mi n‑yoonn mu jer na.

⁷ Di maabiyar ponn ni aatunwanbir ni taani cha pinn mi. Uwumbɔr, saah kpa ngeehm ni tiŋann n‑yoonn mɔmɔk pu na, teer mbɔr.

⁸ Uwumbɔr aah ŋan sakpen pu na, le u mɔk titunwanbirdam nsan mu bi ga dii na.

⁹ U mɔk binib bi sunn bibaa taab na nsanyaan, le ki mɔk bi waageehn.

¹⁰ U gee binib bi tii waah pu tipuur ti na naadii ki keei waamɔb na; u mɔk bi waasan, ki ŋani waah len pu na.

¹¹ Uwumbɔr, li joo saah puu tipuur ti na, ki di maatunwanbir ti wiir sakpen na cha pinn mi,

¹² Binib bi keei Uwumbɔr aamɔb na, ga bee u chee nsan mu bi ga dii na.

¹³ Bi ga li ye biwankpadam n‑yoonn mɔmɔk la, le baabim ga nan li yeh kitiŋ kee.

¹⁴ Uwumbɔr aajɔtiib le ye binib bi keei waamɔb na, le u mɔk bi waah puu tipuur ti na aatataa.

¹⁵ Uwumbɔr chee le m ban nterm n‑yoonn mɔmɔk, le u nyani mi linimaln ni.

¹⁶ Uwumbɔr, fenn lik mi, ki san mi kinimbaak, ba pu? ubaa aa bi m chee, le nwon yɔl.

¹⁷ Nyan mi maalandak ni, ni maabɔbir mɔmɔk ni.

¹⁸ Lik maasuubiin, ni maafalaa wee, ki di maatunwanbir mɔmɔk cha pinn mi.

¹⁹ Lik maah kpa bidim pu na, lik baah nan mi pu na.

²⁰ Li kii mi ki gaa mi lii, ki taa cha maadim ngbaan nyaŋ mi, sin chee le m choo ban limɔfal.

²¹ Cha maaŋann ni maabamɔn gaa mi lii; ba pu? m kpa gaakii aa pu.

²² Uwumbɔr, nyan Israel aanib baabɔr mɔmɔk ni.