Ilahn 24 - Uwumbɔr aagbaŋ

Ubɔrkpaan na

¹ Uwumbɔr le yeh dulnyaa, ni tiwan nimɔk bi u ponn ni na; kitiŋ kee, ni bi mɔmɔk bi ki pu na ye u yaab la.

² U maa kitiŋ na nnyun mu nyoo ki bi kitiŋ aataab pu na la, le ki ŋa kaadinyikl nnyusakpem aataab.

³ Ŋma ŋeer ke u jon Uwumbɔr aagongoln? Ŋma ŋeer ke u koo Waadichal li bi chain na ponn ni?

⁴ Binib bi aabimbin ni baalandak ŋan na, kaa dii ŋiwaa, kaa puur tipuur ti kaa gbiini na, bima baanja le kpa kina aasan.

⁵ Uwumbɔr ga ŋa waanyoor ŋa bi pu ki gaa bi lii; Uwumbɔr ga bui ke baabɔr ŋan.

⁶ Kina aanib le choo Uwumbɔr chee, bima le choo Uwumbɔr u Jakob mu nan dii u na aanimbiin ni.

⁷ Chuu piir waan man ibisamɔi, piir man n‑yaayoonn na aajaaleŋ mam na, ki cha ubɔrkpaan ngbaan koo ni.

⁸ Ŋma ye ubɔrkpaan ngbaan? Uma le ye Uwumbɔr Mpɔɔnsakpiindaan u pɔɔ na, Uwumbɔr u nyaŋni butɔb ni na.

⁹ Chuu piir waan man ibisamɔi; piir man n‑yaayoonn na aajaaleŋ mam na, ki cha ubɔrkpaan ngbaan koo ni.

¹⁰ Ŋma ye ubɔrkpaan ngbaan? Uwumbɔr linyaŋdaan le ye ubɔrkpaan ngbaan.