Ilahn 22 - Uwumbɔr aagbaŋ

Falaa sakpiin aawiil, ni kipak aalahn

¹ Maawumbɔr, Maawumbɔr, ba pu aa siir cha mi? M wii sakpen ki ban nterm, le mu aa kee choo.

² Maawumbɔr, nwiin pu kan, m wii yin si la, le saa gar mi. M yin si kinyeek mu, le kaa kani lifuur.

³ Le aa ka libɔrjal pu ki bi chain, sin le ye Uwumbɔr u Israel yaab pak u na.

⁴ Tiyaajatiib nan di baanaadii tii si la; bi nan di naadii tii si, le aa gaa bi lii,

⁵ bi nan yin si, le ki nyan linimaln ni, bi nan tii si naadii, le kaa jin inimɔɔn.

⁶ Tɔ, mma aa ki ye unibɔn; m gur ye likpaambil la, le bi mɔmɔk lik seen mi, ki seei mi.

⁷ Binib bi mɔmɔk kan mi na laa mi, bi leeni bilambil le ki gbakr biyil.

⁸ Bi len ke, “U gaa Uwumbɔr ki kii, ba ŋa waa gaa u lii? Uwumbɔr yaa gee u kan, ba ŋa waa ter u?”

⁹ Uwumbɔr, sin le nan nyan ni mi nna aaponn ni le m fu, le maah nan laa ye ubo pu na, aa kii mi.

¹⁰ Bundaal bi maa mi na le m nan di naadii tii si, le aa ye Maawumbɔr n‑yoonn mɔmɔk.

¹¹ Taa li daa mi. Tibɔbir duun mi, le ubaa aa bi ki ga ter mi.

¹² Bidim pam le mann goln mi ke inaaja na; bi mann gob mi la, ki naahn Basann aatiŋ aanaaja i bir na.

¹³ Bi waa bimɔi ke ichinn na la, ki ŋuuni ki dar par mi.

¹⁴ Maapɔɔn mɔmɔk doo ke nnyun mu kpir kitiŋ na aah foor pu na. Bi tukl maakpab mɔmɔk; le mpobil donn ke tisikakpiin na.

¹⁵ Nneen ni kuur ke titan na la, le nlambil tam nlakpaŋ. Aa di cha mi titan ni, ki di mi tii nkun.

¹⁶ Titunwanbirdam kuun goln mi ke kibɔpaak na, ki ban mi; bi dar par ntaa ni ŋŋaal.

¹⁷ M ga ŋmaa kahn maakpab mɔmɔk. Maadim lik mi, le ki nan mi.

¹⁸ Bi di maawanpeenkaan yakr tii tɔb, ki too inaan maakpalk pu.

¹⁹ Uwumbɔr, taa li daa mi. Dan mala ki nan gaa mi lii.

²⁰ Nyan mi kijaak aajuk ni; nyan maamɔfal ibɔ yee ni.

²¹ Gaa mi ichinn yee chee; maa kpa mpɔɔn mubaa inaajabir yee chee.

²² M ga bui maanib saah tun pu na; m ga pak si baah kuun nin chee na:

²³ “Nimi bi ye Uwumbɔr aatutum na, pak u man. Nimi Jakob aayaabitiib, nyuŋ u man. Nimi Israel aanib, doon u man.

²⁴ Waa suln bigiim ni bifalaadam bɔr; waa fenn upuwɔb tii bi, u keei bi.”

²⁵ Kinipaak aah kuun nin chee na, le m ga pak si saah tun pu na pu. Binib bi dooni si na aanimbiin ni, le m ga toor kitork ki m nan puu na.

²⁶ Bigiim ga ji baah ban pu na la; binib bi choo Uwumbɔr chee na ga pak u. Tii bi nkam n‑yoonn mɔmɔk.

²⁷ Ŋitimbol mɔmɔk ga teer Uwumbɔr bɔr. Bi ga nya ni dulnyaa aapepel mɔmɔk ni, ki dan u chee; Ŋinibol mɔmɔk ga doon u.

²⁸ Uwumbɔr le ye ubɔr, le ki joo ŋitimbol mɔmɔk.

²⁹ Bigaadam mɔmɔk ga gbaan unimbiin ni; binibɔm mɔmɔk ga gbaan unimbiin ni.

³⁰ N‑yoonn mu choo na yaab ga nan tun tii u; binib ga len Uwumbɔr aabɔr n‑yoonn mu choo na yaab chee.

³¹ Bi ga bui binib bi baa kee ma bi na ke: “Uwumbɔr gaa waanib lii.”