Ilahn 21 - Uwumbɔr aagbaŋ

Linyaŋ aapakm

¹ Uwumbɔr, ubɔr aasui piir, ba pu? aa tii u mpɔɔn; saah tii u linyaŋ pu na le u kpa mpopiin.

² Aa tii u usui aah ban pu na; aa kii waameel.

³ Aa joo ni u tinyoor sakpen le ki di salmaa aabɔryikpupuk chiŋ u.

⁴ U mee si limɔfal, le aa tii u limɔfal li fɔk kaa kpa ndoon na.

⁵ Saaterm pu le waapak wiir; aa tii u liyimbil ni mpɔɔn,

⁶ le saanyoor bi u pu n‑yoonn mɔmɔk, saah bi u chee pu na le tii u mpopiin.

⁷ Ubɔr tii Uwumbɔr Mpɔɔnsakpiindaan naadii; le Uwumbɔr aageehm mu kaa kpa ndoon na pu, u bi ŋŋmarm ni n‑yoonn mɔmɔk,

⁸ Ubɔr ngbaan ga chur waadim mɔmɔk; u ga chur binib bi mɔmɔk kaa gee u na.

⁹ U yaa nyan ni kan, u ga bii bi mɔmɔk doo ke mmii mu wu na la. Uwumbɔr aaŋuul ni le u ga di bi mɔmɔk nab ke mmii mu wu na.

¹⁰ Biyaabitiib ponn ni ubaa aan ŋmar, ubɔr ga ku bi mɔmɔk.

¹¹ Bi dakl baalandak le ki kpokl u pu, bi mu aan ŋman.

¹² U ga too bi waapiin, ki cha bi fenn bipuwɔb ki san.

¹³ Uwumbɔr, ti pak si, saapɔɔn sakpiin pu. Ti ga gaa ilahn ki pak saapɔɔn.