Ilahn 2 - Uwumbɔr aagbaŋ

Uwumbɔr aah lee ubɔr u na

¹ Ba ŋa ŋinibol kpokl ke ŋi yii Uwumbɔr aamɔb? Ba ŋa binib dak ilandak i kaa kpa tinyoor na?

² Baabɔrb yiil Uwumbɔr aamɔb, le baajojoob kpaani ki kpokl Uwumbɔr, ni waah lee ubɔr u na pu.

³ Bi len ke, “Cha ti gaa tibaa bi chee man, cha ti di baasan mee man.”

⁴ Le Uwumbɔr ka waabɔrjal pu paacham, ki laa bi, ki ŋani bi yaansara, baalandak i kaa pɔɔ na pu.

⁵ Le waaŋuul ponn ni u sak bi, ki di waaŋuul faan bi.

⁶ U bui ke, “Maagongoln Sionn li bi chain na pu, le m maa kaan maabɔr.”

⁷ Ubɔr ngbaan len ke, “M ga moon Uwumbɔr aah len pu na. U bui mi ke, ‘Sin le ye maabo, din wee le m ma si.

⁸ Mee mi, aan m ga di ŋitimbol ngbaan mɔmɔk tii si; kitiŋ kee mɔmɔk ga li ye sin yaan la.

⁹ Aa ga di tikur aadabil gbaa kool bi; aa ga gbaa wii bi yak yak ke tiyakr aabuul na la.’”

¹⁰ Nimi bibɔrb, li pel man nsurm mue; nimi dulnyaa aajojoob, bae man mbaem mue:

¹¹ Di ijawaan dii Uwumbɔr man,

¹² li gbeer man ki ti gbaan unimbiin ni; naa ye kina kan, waaŋuul ga fii mala, le ni ga kpo libuul ngbaan ni. Binib bi mɔmɔk chaa u chee ti ban ke u kiir bi na kpa mpopiin.