Ilahn 19 - Uwumbɔr aagbaŋ

Uwumbɔr aah naan tiwan mɔmɔk pu na aapak

¹ Kitaapaak kpiir Uwumbɔr aapak aah bi pu na ki mɔk chain. Ki mɔk waah tun pu na chain.

² Nwiin mɔk joo waapak nabr tii nwiin mu paa ni mu pu na la; le kinyeek mɔk mu ki gir nabr ti ki tii ki paa ni na.

³ Baa joo bimɔi len ti, binib aa ŋun kifuuk kibaa pu;

⁴ le bineel mu tee chaa dulnyaa wee mɔmɔk ni, le kitiŋ kee mɔmɔk pu ŋun. Uwumbɔr maa lidichal kitaapaak le tii nwiin;

⁵ mu nya ni kichakpiik ni ke upiidinn u kpa mpopiin na la, ki naahn utaasann u gor ubaa pu ki cha litaasaln na la.

⁶ Mu piini kitaapaak liwipuul wɔb la, le ki chuun ti saa liwilir wɔb. Nibaa aan ŋmaa bɔr mu aatotoŋ chee.

Uwumbɔr aakaal

⁷ Uwumbɔr aakaal si chob la; le ki tii binib mpɔɔn pɔɔn. Aa ga ŋmaa mak Uwumbɔr aakaal pu, mu tii nlan aah par binib bi na nlan.

⁸ Uwumbɔr aakaal ye ibamɔn la, le binib bi kii tii i na kpa mpopiin. Uwumbɔr aakaal si chob la, le ki tii unibɔn aasui ŋuntii.

⁹ Aa yaa dooni Uwumbɔr kan, ni ŋan; naan li kpa ndoon. Uwumbɔr aabɔjil si chob la; li dii ibamɔn la.

¹⁰ Uwumbɔr aamɔbon ŋan jer salmaa u bi pun u mmii ni ki nyan waajɔŋ mɔmɔk na, ŋi mɔ jer tisiir ti wiin chain na.

¹¹ Ŋi tii mi, saatutunn nlan; le aa pa mi maah kii tii ŋi pu na.

¹² Ubaa aan ŋmaa kan waah yenn waatuln ponn ni nin chee na; Uwumbɔr, nyan mi titunwanbir ti bɔr na ni,

¹³ ki ki nyan mi titunwanbir ti m nyi ki tun ti na ni; taa cha ti li kpa mpɔɔn m pu, aan m li ŋan chain ki taa li kpa titunwanbir tibaa.

¹⁴ Uwumbɔr u gaal mi lir ki tii mi lifuur na, cha maamɔbon ni maalandak li ŋan aa chee.