Ilahn 18 - Uwumbɔr aagbaŋ

Ubɔr David aah gaa nlahn mu na buyoonn Uwumbɔr gaa u Ubɔr Sɔɔl ni bidim biken mɔmɔk chee lii na.

¹ Uwumbɔr, maah gee si pu na aa kpa ŋŋaŋ. Sin le ye maapɔɔn.

² Uwumbɔr le ye maakikiir; uma le ye maadiik ki pɔɔ na. Maawumbɔr le ye u kii mi na, le m yaa bi u chee kan, m ŋmar. U kii mi ke kijaak aapeln na la; u kii mi le m bi ŋŋmarm ni.

³ M yin Uwumbɔr, le u gaa mi maadim chee lii. Pak Uwumbɔr man.

⁴ Nkun aanimaln le nan mann gob mi; mbiin aabuln nan mann goln mi.

⁵ Nkun aanimaln le nan mann gob mi, le likaakul pen mi laagaawɔb.

⁶ M yin Uwumbɔr maamukl ni; m yin Maawumbɔr ki ban nterm. Le u bi waadichal ni ki ŋun maaneel; u nan ŋun maaterm aawiil pu.

⁷ Le kitiŋ dam ki deŋ; ŋijoo aah baa nin chee na dam ki jii, ba pu? Uwumbɔr aaŋuul le nan fii.

⁸ Iŋmanyuu nan nyan ni umɔfataabun ni, le mmiigaal, ni mmiisakɔn nyan ni umɔb ni.

⁹ U nan daa kar kitaalangbaŋ ki sunn ni, le ntaalangbam bɔmbɔm bi utaapɔtan taab.

¹⁰ U nan fii mala, tiwan ni kpa ifeen na pu, u nan chuun libuln pu la.

¹¹ U nan di mbɔmbɔɔn le biin ubaa pu, ntaalangbam mu nyuun ki gbii ntaanyun na le nan mann goln u.

¹² Ŋitaatakpal ni mmii mu moor na le nan gaal ki loln u pu nsan, le ki woln ntaalangbam mu nyuun na ponn ni.

¹³ Le Uwumbɔr bi kitaapaak ki teen ke utaal na; le binib mɔmɔk ŋun Uwumbɔr u kaa kpa ŋeen aatɔ na aaneel pu.

¹⁴ U nan too waapiin, le waadim yaa; u nan cha utaal moor, le bi san.

¹⁵ Buyoonn Uwumbɔr aaŋuul fii, aan u kae waadim ki ŋuun ke uchinn na, nnyunsakpem aataab nan doon nkuun, le kitiŋ aah baa nin chee na chuu piir waan.

¹⁶ Uwumbɔr nan nyan ni paacham le ki laan chuu mi; u nan daa nyan mi nnyun mu nyoo na ni.

¹⁷ U nan gaa mi maadim bi pɔɔ sakpen na chee lii, ki gaa mi binib bi mɔmɔk nan mi na chee lii, ba pu? bi nan pɔɔ jer mi.

¹⁸ Maah nan bi tibɔr ni na, le bi nan tak mi, le Uwumbɔr nan kiir mi.

¹⁹ U nan nyan mi linimaln ni; usui aah nan piin m pu pu na, le u nan gaa mi lii.

²⁰ Maah tun ni ŋan na pu na, le Uwumbɔr pan mi kina aapal; maah kaa tun taani ubaa pu na, le u ŋani waanyoor ŋani m pu.

²¹ M kii Uwumbɔr aakaal; maa fenn mpuwɔb tii Maawumbɔr.

²² M dii waakaal mɔmɔk; maa yii waamɔbon.

²³ U nyi ke maa ŋa taani ubaa, u nyi ke maa tun titunwanbir.

²⁴ Kina pu le u pa mi maatunyaan pu, ba pu? u nyi ke maa tun taani ubaa.

²⁵ Uwumbɔr, binib bi si aapuwɔb na, aa mu si bipuwɔb, ki ŋan sakpen, binib bi ŋan na chee.

²⁶ Aa bi chain, binib bi bi chain na chee, le kaa gee bibiindam.

²⁷ Aa gaal binib bi sunn bibaa taab na lir, le ki sunn binib bi kpa kigaak na taab.

²⁸ Uwumbɔr, sin le tii mi nwiihn; sin le jenn maabɔmbɔɔn.

²⁹ Sin le tii mi mpɔɔn ke m di tak maadim, ki tii mi mpɔɔn mu m joo nyaŋni tiwan ni kii bi na.

³⁰ Uwumbɔr ma aabimbin ŋan ti nyaŋ le aa ga ŋmaa li kpa waamɔbon pu limakl. U naahn kijaak aapeln le ki tii binib bimɔk ban waaterm na.

³¹ Uwumbɔr baanja le ye Uwumbɔr; Uwumbɔr baanja le ye u kii timi na.

³² Uma le ye Uwumbɔr u tii mi mpɔɔn na, uma le nyani tibɔbir maasan ponn ni.

³³ U cha m san mala mala ke upeeman na; u nyani mi linimaln ni, ŋijoo paab.

³⁴ Uma le bae mi butɔb aabaem, le m ŋmaa joo butɔm bu pɔɔ sakpen na too.

³⁵ Uwumbɔr, aa kii mi, le ki gaal mi lir, saaterm tii mi liyimbil, le saapɔɔn tii mi ŋŋmarm.

³⁶ Saa cha maadim chuu mi, le maa kee lir.

³⁷ M san dii maadim, le ki chur bi; see m ti ku doo bi, le ki nin sil.

³⁸ M gbaa bi bilni, le baa ki ŋmaa fii, m nyaŋni bi, le bi dɔ nnimbiin ni.

³⁹ Aa tii mi butɔb aapɔɔn ki tii mi linyaŋ maadim pu.

⁴⁰ Aa cha maadim san m chee la; le m ku door binib bi kaa gee mi na.

⁴¹ Bi wii ban nterm, le ubaa mu aan gaa bi lii; bi yin Uwumbɔr, le waan gar bi.

⁴² M nan bi, le bi kpaln kitangbaak ki libuln daar joo cha na. M taa bi pu kitiŋ ponn ni ke tikpakpar na la.

⁴³ Aa gaa mi binib bi yii maamɔb na chee lii, ki ŋa mi ŋitimbol aayidaan, maah kaa nan nyi binib bi na le gur ye maatutum.

⁴⁴ Biwɔwɔm gbaani nnimbiin ni la; m yaa len kan, bi keei maamɔb la.

⁴⁵ Bitaakpab yɔl la, le bi san gbeer nyani baapɔɔn aatim ni.

⁴⁶ Uwumbɔr bi n‑yoonn mɔmɔk. Pak maakikiir man. Moon man ke Uwumbɔr kpa mpɔɔn; u gaal mi lir na pɔɔ sakpen a.

⁴⁷ U tii mi linyaŋ maadim pu; u sunni ŋitimbol ŋani ntaapɔtan ni,

⁴⁸ ki gaal mi maadim chee lir. Uwumbɔr, aa tii mi linyaŋ maadim pu ki kii mi bijab bi bir na chee.

⁴⁹ Kina pu le m pak si ŋitimbol ponn ni; m gaa ilahn ki pak si.

⁵⁰ Uwumbɔr le tii mi, waabɔr, linyaŋ sakpeln ngbaan; u mɔk waah lee u na ngeehm n‑yoonn mɔmɔk la, u mɔk mi, David, ni n‑yaabitiib waageehm ki ti saa n‑yoonn mu kaa kpa ndoon na.