Ilahn 17 - Uwumbɔr aagbaŋ

Unii u kaa kpa taani na aameel

¹ Uwumbɔr, li pel maah gaŋni si ki ban ibamɔn pu na; pel maah wii ki ban nterm pu na. Ŋun maameel li bi chob na.

² Aa ga len tibɔr kpee m pu, ba pu? aa nyi ni ye ibamɔn na.

³ Aa nyi nsui. Aa dan m chee kinyeek ki nan tɔŋ mi mbamɔm, ki kan ke maa kpa titunwanbir tibaa.

⁴ Maa len tibɔbir ke biken na; m kii ki dii saamɔkm, kaa dii mbimbin mu pɔɔ na aasan.

⁵ M chuun saasan ponn ni le n‑yoonn mɔmɔk, kaa kee yenn mu ni.

⁶ Uwumbɔr, m mee si la, ba pu? aa keei mi, kina pu na, fenn ni m chee ki ŋun maamɔbon.

⁷ Kpiir saageehm mu kpa iwaan na ki gaa mi lii; m yaa si gbɔk si kan, m fuur maadim chee.

⁸ Li kii mi ke saah ga kiir aabaa aanimbil pu na; di mi bɔr saafeen aajunjuŋ ni,

⁹ aan bibiindam taa pii mi. Bidim bi bir na mann goln mi la;

¹⁰ baa san kinimbaak, le ki len kigaak aaliin.

¹¹ M yaa fenn niwɔb na kan, bi mann goln mi la, ki kii ke bi kan nsan siib ki daa mi lii.

¹² Bi si kiir mi ke ichinn na la, ki ban ke bi daa par par mi.

¹³ Uwumbɔr, fii, laŋ maadim aasan ki nyaŋ bi. Di saajaak aajuk gaa mi lii bibiindam chee.

¹⁴ Gaa mi binib bi kpa baah ban pu na mɔmɔk dulnyaa wee ni na chee lii. Di saah di ntafadaan mu siin kiir bi na daa bitafal; cha ntafadaan ngbaan gur ki nan pii baabim aan muken mu le kii biyaabitiib.

¹⁵ Le mma ga kan si, ba pu? maa tun taani ubaa; le m yaa finn ngeen pu kan, saah bi m chee pu na ga tii mi mpopiin.