Ilahn 149 - Uwumbɔr aagbaŋ

Kipak aalahn

¹ Pak Uwumbɔr man. Gaa nlahnpɔɔn tii Uwumbɔr man; pak u waanib bi kii waamɔb na aakuun ni.

² Israel yaab, li kpa mpopiin Uwumbɔr u nan ŋa nimi litimbol na pu; Sionn yaab, li mɔɔni Uwumbɔr u ye nimi aabɔr na pu man.

³ Li waa liwaal pak waayimbil man; di ŋigangan ni tibar pak u man.

⁴ Uwumbɔr neen waanib; u joo linyaŋ tii binib bi sunn bibaa taab na ki nyuŋni bi.

⁵ Cha Uwumbɔr aanib li mɔɔni baah nyaŋ pu na pu, ki gaa mpopiin aalahn ti woln kitaak.

⁶ Cha bi li tar mpɔɔn pu ki pak Uwumbɔr, ki li joo baajaak aajum mu ka na biŋaal ni,

⁷ ki nyaŋ ŋitimbol ŋi kaa dii Uwumbɔr aasan na, ki daa bitafal;

⁸ ki di tikur aakululn buu baabɔrb ni baayidam;

⁹ ki daa ŋitimbol ngbaan aatafal Uwumbɔr aah siin pu na. Uwumbɔr aanib aanyaŋ le bi na. Pak Uwumbɔr man.