Ilahn 148 - Uwumbɔr aagbaŋ

Baah yin dulnyaa mɔmɔk ke bi nan pak Uwumbɔr pu na

¹ Pak Uwumbɔr man. Paacham yaab, pak Uwumbɔr man, nimi bi bi paacham paacham na, pak u man.

² Nimi waatuuntiib mɔmɔk bi bi paacham na, pak u man.

³ Nwiin ni uŋmal, pak u man; iŋmabi i moor lak lak na, pak u man.

⁴ Paacham paacham yaab, pak u man, nnyun mu bi kitaapaak paab na, pak u.

⁵ Cha bi mɔmɔk pak Uwumbɔr aayimbil. Waamɔboln le nan naan ni mɔmɔk.

⁶ Waamɔboln le nan di ni mɔmɔk siin naabuu ponn ni ki ti saa n‑yoonn mu kaa kpa ndoon na; le naa ŋmaa yii waamɔb.

⁷ Nimi kitiŋ yaab, pak Uwumbɔr man, nimi nnyusakpem ni aawansakpiin, ni tiwan ni bi mu aanyonyoo ni na, pak u man;

⁸ utaal aah moor pu na, ni ŋitaanal, ni ntaalangbam, ni ŋibun ŋi pɔɔ ki kii waakaal na, pak u man.

⁹ Nimi ŋijoo, ni ŋigongon, pak u man, nimi ŋisubil aasui, ni tichoor, pak u man,

¹⁰ nimi tiwakor mɔmɔk, linampal ni timoor ni aawakor, pak u man, nimi ikuub, ni inyoon, pak u man.

¹¹ Nimi bibɔrb, ni binib mɔmɔk, pak u man, nimi ntim aajojoob, ni biyidam bi mɔmɔk gur na, pak u man,

¹² nimi bisapɔm, ni binachipɔm, pak u man, nimi bininkpiib, ni mbim mu, pak u man.

¹³ Cha bi mɔmɔk pak Uwumbɔr aayimbil. Waayimbil jer ŋiyimbil mɔmɔk, waanyuŋ jer paacham ni kitiŋ.

¹⁴ U nan gee waatimbol Israel yaab pam ki tii bi mpɔɔn, nima pu le bi pak u. Pak Uwumbɔr man.