Ilahn 147 - Uwumbɔr aagbaŋ

Uwumbɔr Mpɔɔnsakpiindaan aapak

¹ Pak Uwumbɔr man. Ni ŋan ke ti li gaa ilahn ki pak Uwumbɔr; ni kpa mmɔɔn ki ŋan ke ti pak u.

² Uwumbɔr ki bi maa Jerusalem la; u bi giini binib bi nan bi tinaagbiir ni na la.

³ U sɔŋni binib bi aasui bii na aasui, ki poo biini baabuun pu.

⁴ U tii iŋmabi yaakahm, ki yin imɔk yaayimbil.

⁵ Tidindaan ye Mpɔɔnsakpiindaan la; ubaa aa nyi waalan aah ti saa pu na.

⁶ U fiini binib bi suln bibaa taab na paacham, le ki tee wɔi bibiindam bilni kitiŋ.

⁷ Gaa kipak aalahn tii Uwumbɔr man; di kibeek gaa ilahn tii timi Aawumbɔr man.

⁸ U cha ntaalangbam biini kitaapaak pu; u cha utaal nu kitiŋ pu, ki cha timoor punni ŋigongon pu.

⁹ U tii tiwakor taajikaar, le ŋikakaa aabim yaa wii kan, u kpiini bi.

¹⁰ Utafal aa bi itaan i pɔɔ na ni, kaa bi bijab bi kaar na ni;

¹¹ u neen binib bi nyuŋni u ki mak waageehm mu bi n‑yoonn mɔmɔk na pu la.

¹² Jerusalem, pak Uwumbɔr. Sionn, pak Saawumbɔr.

¹³ U cha saagon aabisamɔi pɔɔ, u ŋani waanyoor ŋani saanib pu.

¹⁴ U joo saatiŋ aanaanmɔk le bidim aan ŋmaa koo ni, ki tii si njikaabim mu ŋan sakpen na le aa ji babr.

¹⁵ U tii kitiŋ limɔboln, le waah len pu na ŋani mala.

¹⁶ U taln ŋitaanal ke likekeln na la, ki cha likpakpal yaani ke kitangbaak na.

¹⁷ U cha ŋitaatakpal lir ni ke isak na; tiwoor ti u tun ni na nyaŋ sakpen a,

¹⁸ le u tii limɔboln, le ŋitaanal donn, u tun ni libuln, le nnyun puu cha.

¹⁹ U joo waamɔboln tii waanib Israel yaab, u tii bi waakaal ni waamɔkm.

²⁰ Waa tun kina tii ŋitimbol ŋiken; baa nyi waakaal. Pak Uwumbɔr man.