Ilahn 146 - Uwumbɔr aagbaŋ

Uwumbɔr u gaal timi lir na aapak

¹ Pak Uwumbɔr man. M ga pak Uwumbɔr.

² Maamɔfal mɔmɔk ni, m ga pak u; m ga gaa ilahn tii Maawumbɔr maamɔfal mɔmɔk ni.

³ Taa li kpa limakl unibɔn aayidam pu, unibɔn aan ŋmaa nyan si tibɔr ni.

⁴ Bi yaa nan kpo kan, bi ki kpaln titan la; baah ŋani ilandak i na mɔmɔk doo liyaadaal ngbaan le na.

⁵ Uwumbɔr aah ter unii u aan udaan kpa limakl Udindaan Uwumbɔr pu na kpa mpopiin la.

⁶ Uma Uwumbɔr le tiyaaja Jakob mu nan dii, uma le nan naan paacham, ni kitiŋ, ni nnyusakpem, ni tiwan ni mɔmɔk bi ni ponn ni na. U ŋani waah puu tipuur ti na n‑yoonn mɔmɔk;

⁷ u len tibɔr ter baah muk binib bi na, ki tii nkon aah joo binib bi na tijikaar. Uwumbɔr nyani binib bi bi tiyondir ponn ni na lir,

⁸ le ki likr bijoom aanimbil. U fiini binib bi lir ki dɔ na siini paacham; u gee waanib bi aabimbin ŋan na.

⁹ Uma le joo bicham bi bi timi aatiŋ pu na; u ter bikpopiib ni nkpobim, le ki tee bii bibiindam aah kpokl pu na.

¹⁰ Uwumbɔr le ye ubɔr n‑yoonn mɔmɔk. Sionn aatiŋ aanib, nimi Aawumbɔr aanaan aan doo. Pak Uwumbɔr man.