Ilahn 145 - Uwumbɔr aagbaŋ

Kipak aalahn

¹ Maawumbɔr u ye maabɔr na, m ga moon saah kpa mpɔɔn pu na; m ga li dooni si ki ti saa n‑yoonn mu kaa kpa ndoon na.

² M ga li dooni si iwiin mɔmɔk; m ga li pak si ki ti saa n‑yoonn mu kaa kpa ndoon na.

³ Uwumbɔr kpa mpɔɔn, kina pu le ni ŋan ke ti pak u sakpen; waapɔɔn nyaŋ a.

⁴ Uwumbɔr, bi ga li pak saah tun pu na ki nya binib bibaa aayoonn ki ti saa biken aayoonn; bi ga moon saah tun ŋitukpaan ŋi na aabɔr.

⁵ Bi ga li len saah kpa mpɔɔn ni kipak pu na, le m ga li dakl lik saatukpaan ngbaan.

⁶ Binib ga len saah tun ŋitukpaan ŋi na aabɔr, le m ga moon saah kpa mpɔɔn sakpiin mu na.

⁷ Bi ga len saah kpa tiŋann ti mɔmɔk na, ki di gaa ilahn.

⁸ Uwumbɔr kpa ngeehm le ki san kinimbaak, waaŋuul aa fiir mala mala, le waageehm wiir, kaa kpa ndoon.

⁹ U kpa unibɔn mɔmɔk pu tiŋann, ki san waah naan tiwan ni mɔmɔk na kinimbaak.

¹⁰ Uwumbɔr, saawanfuurkaan mɔmɔk ga pak si, le saanib mɔmɔk ga doon si.

¹¹ Bi ga len saanaan aapɔɔn aah kpa kinyuŋ pu na, ki len saah kpa mpɔɔn pu na,

¹² le unii mɔmɔk ga bee saatukpaan na, ni kinyuŋ aapɔɔn mu saanaan kpa na.

¹³ Saah ga joo binib pu na aa kpa ndoon. Aa ga li ye ubɔr n‑yoonn mɔmɔk. Uwumbɔr ŋani waah puu tipuur ti na mɔmɔk, ki san kinimbaak waatuln mɔmɔk ni.

¹⁴ U ter binib bi bi tibɔr ni na; u fiini binib bi lir ki dɔ na.

¹⁵ Uwumbɔr, tiwanfuurkaan mɔmɔk lik sin pu le ki mak, le buyoonn ni ban tijikaar na, aa tii ni.

¹⁶ Aa tii ni, ni ŋeer ni na, le ni mɔmɔk ji ki babr.

¹⁷ Uwumbɔr aah tun pu na mɔmɔk ŋan, u san kinimbaak waatuln mɔmɔk ni.

¹⁸ U bi duun binib bi yin u ni bisui mɔmɔk na.

¹⁹ U tii binib bimɔk nyuŋni u na baah ban pu na; u ŋun baawiil le ki nyani bi tibɔr ni.

²⁰ U kiir unii umɔk gee u na, le ki tee ga kuln bibiindam.

²¹ M ga pak Uwumbɔr n‑yoonn mɔmɔk. Cha waawanfuurkaan mɔmɔk li pak waayimbil li bi chain na ki ti saa n‑yoonn mu kaa kpa ndoon na.