Ilahn 144 - Uwumbɔr aagbaŋ

Ubɔr aah kan linyaŋ ki doon Uwumbɔr pu na

¹ Pak Uwumbɔr man, u ye maakikiir la. U gor mi kiir kijaak ki toor mi kiir butɔb.

² Uma le ye maakikiir, ki si mpuwɔb; uma le ye nin chee m bɔrni na, uma le gaal mi lir, u chee le m mak ke nibaa aan ŋa mi. U cha m ye ŋitimbol aayidaan.

³ Uwumbɔr, unibɔn ye ba aan aatafal bi u ni; unibɔn mu, le aa cha aatafal bi u ni.

⁴ U bi ke litakpiln libaa aabuln na la; waamɔfal naahn kijunjuŋ ki bi jer na la.

⁵ Uwumbɔr, chuu daa kar kitaapaak ki sunn ni; di aaŋaal meeh ŋijoo, aan ŋi nya iŋmanyuu.

⁶ Cha utaal moor ki yaa saadim; too saapiin aan bi san yaa.

⁷ Nya ni paacham, chuu daa nyan mi nnyun mu nyoo na ni, ki gaa mi lii; nyan mi biwɔwɔm bi kaa len ibamɔn,

⁸ ki puur tipuur inyamɔn pu na aapɔɔn ni.

⁹ Uwumbɔr, m ga gaa nlahnpɔɔn tii si, m ga gbaa kibeek ki gaa ilahn tii si.

¹⁰ Aa tii bibɔrb linyaŋ, ki gaa saatutunn David lii.

¹¹ Gaa mi maadim bi ye bibiindam na chee lii; nyan mi biwɔwɔm bi kaa len ibamɔn ki puur tipuur inyamɔn ni na aapɔɔn ni.

¹² Cha tijapɔtiib li bi ke isui i muuni ki pɔɔ na baanachipɔnn ni. Cha tibisatiib li bi ke ŋigonyaan ŋi tii libɔrchiln kinyaan na.

¹³ Cha timi aapil li gbii tijikaar mɔmɔk aabɔŋ. Cha timi aapiih i bi kipihkpaamook ni na pɔr churbakaa.

¹⁴ Cha timi aanaa pɔr ki taa li nyeeni lir, ki taa kpoi. Taa cha mpombiin aawiil li bi timi aatim ponn ni.

¹⁵ Litimbol li kpa kina na kpa mpopiin; binib bi Aadindaan ye Uwumbɔr na kpa mpopiin.