Ilahn 143 - Uwumbɔr aagbaŋ

Limeel li ban nterm na

¹ Uwumbɔr, ŋun maameel. Saaŋann pu, ŋun maah gaŋni si pu na. Aa ye mbamɔndaan, kii maagaŋ ngbaan.

² Taa ji mi, saatutunn tibɔr; ubaa aa bi kaa kpa taani aa chee.

³ Maadin ban mi, ki chuu mi, ki nyaŋ mi kookoo a. U di mi ŋa kiyondiik bɔmbɔɔn na ni, le m gur bi ke binib bi kpoi n‑yaayoonn na.

⁴ Kina pu na, m gor ke m di cha la, ntaakpab yɔl kookoo a.

⁵ M teer n‑yoonn mu jer na; m dak saah nan tun pu n‑yoonn ngbaan na, saatun mɔmɔk beenin bi n‑yil ni.

⁶ M yoor ŋŋaal paacham ki mee si; m neen si ke kitikuun aah neen nnyun pu na la.

⁷ Uwumbɔr, ŋun maayim dandana wee, maa ki kpa ntaakpab pɔɔn mubaa. Taa di aabaa bɔr mi, ni yaa kaa ye kina kan, m ga li gur kpaan binib bi bi kitekpiitiŋ ni na chee la.

⁸ Kichakpiik mɔmɔk ni kan, teer mi saageehm mu bi n‑yoonn mɔmɔk na pu; ba pu? sin pu le m kpa limakl. Maameel chaa aa chee paacham la; mɔk mi nsan mu m ga dii na.

⁹ Uwumbɔr, aa chee le m chaa ti ban nkiirm; gaa mi maadim chee lii.

¹⁰ Sin le ye Maawumbɔr; mɔk mi aan m ŋa saageehn. Li gee mi, ki mɔk mi nsanyaan.

¹¹ Uwumbɔr, saah nan puu ke aa ga ŋa pu na, gaa mi lii; saaŋann sakpenn pu, nyan mi maabɔr ni.

¹² Saah gee mi pu na pu, ku maadim, ki kuln binib bi mɔmɔk muk mi na, ba pu? m ye saatutunn la.