Ilahn 142 - Uwumbɔr aagbaŋ

David aah nan be kitakpaluŋ ni na, le u nan mee limeel limina.

¹ M yin Uwumbɔr ki ban nterm la; m gaŋni u la.

² M joo ni maamuk mɔmɔk u chee la; m tuk u maabɔr mɔmɔk.

³ Buyoonn m ti gor ke m di cha na, u nyi maah ba ga ŋa tiwan ni na. Maah chuun nsan mu pu na le maadim pen mi gaawɔb.

⁴ M yaa fenn lik nsikakl mɔmɔk kan, ubaa aa bi ki ga ter mi, ubaa aa bi ki ga li kii mi, ubaa aatafal aa bi m ni.

⁵ Uwumbɔr, m wii yin si ki ban nterm la; Uwumbɔr, sin le ye u kii mi na. Sin le ye tiwan ni mɔmɔk m ban maamɔfal ponn ni na.

⁶ Pel maaterm aawiil yee, itaakpayɔl le ban i ku mi. Gaa mi maadim chee lii; bi pɔɔ nyaŋ mi.

⁷ Nyan mi maasuubiin ni, le m ga pak si, saanib aakuun ni, ba pu? aa kpa m pu tiŋann sakpen.