Ilahn 141 - Uwumbɔr aagbaŋ

Kijook aameel

¹ Uwumbɔr, m yin si; nan ter mi dandana. Buyoonn m yin si na kan, pel m chee.

² Gaa maameel ke tulalee aayon aatork na, ki gaa maaŋaal i m yoor paacham na ke kijook aatork na.

³ Uwumbɔr, ban ukikiir kiir maamɔb, ki taa cha m len tibɔr ti kaa ŋa na.

⁴ Li kii mi aan m taa li neen ke m tun taani, ki li kii mi m taa kpaan titunwanbirdam chee baabiin aatuln ni. Taa cha m kpaan bi chee baajim ponn ni.

⁵ Unii u aabimbin ŋan na ga ŋmaa daa ntafal ki di tibɔnyaan sur mi. Maan tee gaa kinyuŋ titunwanbirdam chee, ba pu? n‑yoonn mɔmɔk kan, m mee limeel baatunwanbir ngbaan pu la.

⁶ Buyoonn baajojoob ti nyan ŋijoo paab ki ker lir ni na, le binib ngbaan ga tii naadii ke maabɔr nan gbii.

⁷ Baah lar idɔ pu ki chɔi chɔi i na, kina le baakpab ga yaa likaakul aamɔgben chee.

⁸ Ndindaan Uwumbɔr, le m ma kii tii si n‑yoonn mɔmɔk. M ban saakiirn; taa cha m kpo.

⁹ Li kii mi, m taa koo gaawɔb, ni kakpalkaa mam bi titunwanbirdam di pen mi na ni.

¹⁰ Cha bibiindam gir lir bibaa aagaawɔb mam ponn ni, aan mma taa koo titotonn tibaa ni.