Ilahn 140 - Uwumbɔr aagbaŋ

Nkiirm aameel

¹ Uwumbɔr, gaa mi titunwanbirdam chee lii; nyan mi binib bi aabimbin pɔɔ na chee.

² N‑yoonn mɔmɔk kan, bi kpokl titunwanbir la, bi ban kijaak n‑yoonn mɔmɔk la.

³ Bilambil bi ke uwaa u kpa liluul na la; baamɔbon kpa liluul ke saapa aaluul na la.

⁴ Uwumbɔr, li kii mi, aan m taa koo bibiindam aapɔɔn ni; nyan mi binib bi aabimbin pɔɔ aan bi kpokl n‑yoonn mɔmɔk ki ban maalirm na aaŋaal ni,

⁵ Binib bi kpa kigaak na pen mi kitaŋ; bi pen kakpalkaa mam, le ki pen gaawɔb mam nsan ni kiir mi.

⁶ M bui Uwumbɔr ke, “Sin le ye Maawumbɔr,” Uwumbɔr, ŋun maah wii ki ban nterm pu na.

⁷ Ndindaan Uwumbɔr, u ye maakikiir, ki ye mpɔɔndaan na, aa kiir mi butɔb ni.

⁸ Uwumbɔr, taa tii bibiindam baah ban pu na; taa cha baah kpokl pu na tun lituln.

⁹ Taa cha maadim kan linyaŋ; cha baah faani mi pu na gir lir bi pu;

¹⁰ Cha mmiisakɔn mu kpa mmii na lir bi pu; cha bi di bi mee ŋa mbuu mu ponn ni baan ki ŋmaa nya ni na.

¹¹ Taa cha binib bi geei inyamɔn paani biken na kan baah ban pu na; cha tibɔbir lir binib bi aabimbin pɔɔ na pu ki kuln bi.

¹² Uwumbɔr, m nyi ke aa ter bigiim baabɔr ni, ki tii maa‑kpa‑dam baabamɔn.

¹³ Binib bi aabimbin ŋan na ga sil pak si; bi ga li bi aanimbiin ni la.