Ilahn 139 - Uwumbɔr aagbaŋ

Uwumbɔr aah nyi pel pel ki san kinimbaak pu na

¹ Uwumbɔr, aa ŋaŋ mi ki nyi maah bi pu na.

² Aa nyi maah ŋani tiwan nimɔk na; aa bi dandar le ki nyi maah dak pu na.

³ M yaa bi tun, bee m yaa ka fuur kan, aa waa mi; aa nyi maatuln mɔmɔk.

⁴ Waahr aan m nin len tibɔr na, aa puun nyi maah ga len pu na.

⁵ Aa mann le ki ti goln mi ni kookoo; saapɔɔn le aa joo kii mi.

⁶ Saah nyi mi pu na ti nyaŋ sakpen a; ni nyaŋ maah nyi pu na.

⁷ Maan ŋmaa buen nibaa chee aan saa bi nima. Maan ŋmaa buen nibaa chee kaa bi aanimbiin ni.

⁸ M yaa ba buen paacham kan, aa bi nima chee; m yaa ba sunn ti doon kitekpiitiŋ ni kan, aa bi nima chee.

⁹ M yaa ba fii paacham ki buen liwipuul, bee m yaa ba buen ti koo liwilir wɔb dandar dandar kan,

¹⁰ aa ba ga li bi nima ki loln m pu nsan, aa ba ga li bi nima ki ter mi.

¹¹ M ba ga bui libɔmbɔln ke li bɔr mi, bee m bui nwiihn mu mann goln mi na ke mu kpaln kinyeek;

¹² le mbɔmbɔɔn aa bɔɔn aa chee, kinyeek wiin chain ke nwiin pu na aa chee. Mbɔmbɔɔn ni nwiihn ye tiwanbaan le aa chee.

¹³ Sin le naan nwon mɔmɔk; aa di mi kpaan tɔb ni, nna aaponn ni.

¹⁴ M pak si; ba pu? Saah naan mi pu na kpa mi iwaan ni lijinjiir, saatun mɔmɔk kpa iwaan, le aa nyi mi mbamɔm.

¹⁵ Buyoonn maakpab nan bi naani suuna nna aaponn ni, aan m bi muuni nima ubaa aa nyi na, aa nan nyi ke m bi nima,

¹⁶ aa nan kan mi le bi nin ma mi. Iwiin imɔk aa di tii mi na ŋmee ki bi saagbaŋ ni waahr aan iwiin ngbaan ibaa nin piin.

¹⁷ Uwumbɔr, saalandak ye m chee tiwankpaan la; i wiir sakpen a.

¹⁸ M yaa ban m kahn i kan, i ga li wiir jer limɔɔtambol. M yaa dɔ geen ki ti finn kan, m beenin bi aa chee la.

¹⁹ Uwumbɔr, m ba gee sakpen ke aa ku bibiindam. M ba gee ke binib bi aabimbin pɔɔ na ba di cha mi suuna.

²⁰ Bi len aa pu tibɔbir; bi len tiwan ni kaa ŋan na saayimbil pu.

²¹ Uwumbɔr, m nan binib bi nan si na sakpen. M lik seen binib bi yii si ki nyan aapuwɔb na.

²² M sil nan bi kinanabamɔŋ la, m yin bi maadim la.

²³ Uwumbɔr, ŋaŋ mi, ki li nyi nsui ni; tɔŋ mi, ki bee maalandak.

²⁴ Lik ke m kpa titunwanbir tibaa aan maa kpa, ki mɔk mi nsan mu nan bi n‑yaayoonn na.