Ilahn 136 - Uwumbɔr aagbaŋ

Idoon aalahn

¹ Uwumbɔr ŋan, kina pu na, doon u man; waageehm aa kpa ndoon.

² Di idoon tii Uwumbɔr u jer ŋiwaa mɔmɔk na; waageehm aa kpa ndoon.

³ Di idoon tii Uwumbɔr u jer dindatiib mɔmɔk na; waageehm aa kpa ndoon.

⁴ Uma baanja le tun iwaan aatukpaan; waageehm aa kpa ndoon.

⁵ U di waalan le naan paacham; waageehm aa kpa ndoon.

⁶ U maa kitiŋ tɔŋ nnyun mu nyoo na pu; waageehm aa kpa ndoon.

⁷ U naan nwiin ni uŋmal; waageehm aa kpa ndoon;

⁸ ke nwiin li wiin nwiin pu; waageehm aa kpa ndoon

⁹ ke uŋmal ni iŋmabi li wiin kinyeek; waageehm aa kpa ndoon.

¹⁰ U nan ku Ijipt yaab aajan aabijabim; waageehm aa kpa ndoon.

¹¹ U nan nyan Israel yaab Ijipt aatiŋ ni; waageehm aa kpa ndoon.

¹² U nan di waaŋaal mu kpa mpɔɔn sakpen na le ŋa kina; waageehm aa kpa ndoon.

¹³ U nan chuu yakr Limɔɔkal Aanyusakpem nfum mulee; waageehm aa kpa ndoon.

¹⁴ U nan di waanib dii nima jer; waageehm aa kpa ndoon;

¹⁵ le ki tee cha Ijipt aabɔr ni waajab bee Nnyusakpem ngbaan ni; waageehm aa kpa ndoon.

¹⁶ U nan di waanib bɔ dii nteersakpiin ni; waageehm aa kpa ndoon.

¹⁷ U ku bibɔrb bi kpa mpɔɔn na; waageehm aa kpa ndoon.

¹⁸ U ku bibɔrkpaam; waageehm aa kpa ndoon.

¹⁹ U ku Amor yaab aabɔr Sihonn; waageehm aa kpa ndoon.

²⁰ U ku Basann aatiŋ aabɔr Og; waageehm aa kpa ndoon.

²¹ U nan di baatim tii waanib Israel yaab; waageehm aa kpa ndoon.

²² U nan di mu tii waatutunn Israel aatimbol; waageehm aa kpa ndoon.

²³ Bidim aah nyaŋ timi na, waa nan suln ti bɔr; waageehm aa kpa ndoon.

²⁴ U nan gaa timi, timi aadim chee lii; waageehm aa kpa ndoon.

²⁵ U tii tiwanfuurkaan mɔmɔk tijikaar; waageehm aa kpa ndoon.

²⁶ Di idoon tii Uwumbɔr u bi paacham na man; waageehm aa kpa ndoon.