Ilahn 135 - Uwumbɔr aagbaŋ

Kipak aalahn

¹ Pak Uwumbɔr man. Uwumbɔr aatutum, pak waayimbil man.

² Nimi bi si Tidindaan Uwumbɔr Aadichal ni na, pak u man.

³ Uwumbɔr aah ŋan pu na, pak u man; u kpa tiŋann, gaa ilahn pak u man.

⁴ U nyan Jakob ke u li ye uyoo, u nyan Jakob aayaabitiib Israel yaab ke bi li ye waanib.

⁵ M nyi ke Uwumbɔr kpa mpɔɔn, u kpa mpɔɔn jer ŋiwaa.

⁶ U ŋani waah gee pu na paacham ni taab, ni nnyusakpem aataab.

⁷ U cha kitaabuŋ nyani kitiŋ aanaanmɔk; ki tii kitaabuŋ mmii mu moor lak lak na, uma le ki cha libuln nyan ni waah siini waawan nin chee na.

⁸ U nan ku njan aabijabim ni tiwakor aajan aawanja mɔmɔk Ijipt ni.

⁹ Nima chee le u nan tun iwaan aatun, ki di daa nima chee aabɔr, ni waaninkpiib aatafal.

¹⁰ U kuln ŋitimbol pam ki ku bibɔrkpaam;

¹¹ u nan ku Amor yaab aabɔr Sihonn, ni Basann yaab aabɔr Og, ni Kanaann aatiŋ aabɔrb mɔmɔk.

¹² U di baatim tii waanib Israel yaab.

¹³ Uwumbɔr, n‑yoonn mɔmɔk kan, bi ga li mooni ke aa ye Uwumbɔr la. Bi ga li teer saabɔr n‑yoonn mɔmɔk.

¹⁴ Uwumbɔr ga li kii waanib; u ga san waatutum kinimbaak.

¹⁵ Ŋitimbol ŋi kaa nyi Uwumbɔr na di tikunabr ni salmaa le naan ŋiwaa; unibɔn aaŋaal le naan ŋi.

¹⁶ Ŋi kpa imɔi, le kaa tee ŋmaa len, ki kpa ŋinimbil, kaa tee waa.

¹⁷ Ŋi kpa ŋitafal, kaa tee ŋun, ŋaa kpaan ŋmaa fuur.

¹⁸ Cha binib bi mɔmɔk naan ŋi ki kpa ŋi pu limakl na li gur bi ke ŋiwaa ŋi bi naan na.

¹⁹ Israel aanib, pak Uwumbɔr man; nimi Uwumbɔr aatotoorb, pak u man.

²⁰ Nimi Liifai yaab, pak Uwumbɔr man; nimi bi mɔmɔk dooni u na, pak u man.

²¹ Pak Uwumbɔr, Sionn aatiŋ ni, pak u, udo Jerusalem ni man. Pak Uwumbɔr man.