Ilahn 132 - Uwumbɔr aagbaŋ

Uwumbɔr Aadichal aah kpa kipak pu na

¹ Uwumbɔr, taa suln David, ni waah nan jin falaa u mɔmɔk na pu.

² Uwumbɔr, teer tipuur ti u nan puu na tii si u ye Mpɔɔnsakpiindaan u Jakob mu nan dii na.

³ U nan puu ke, “Maan kun linampal, kaan doon geen,

⁴ maan fuur, kaan geen,

⁵ see m ti maa nin chee Uwumbɔr ga li koo na, uma Uwumbɔr Mpɔɔndaan u tiyaaja Jakob nan dii u na.”

⁶ Betlehem ni le ti ŋun Nkaal Aadakaa bɔr, le ki ti kan u Jearim aakpaakon ni.

⁷ Le ti bui ke, “Cha ti buen Uwumbɔr Aadichal ni man; cha ti li dooni u waabɔrjal taab man.”

⁸ Uwumbɔr, dii Nkaal Aadakaa u ye saapɔɔn aamɔkl na koo Saadichal ni, ki nan li bi nima n‑yoonn mɔmɔk.

⁹ Cha saatotoorb li tun lituln li ŋan na n‑yoonn mɔmɔk. Cha saanib gaa mpopiin aalahn.

¹⁰ Uwumbɔr, saah nan puu tipuur ti tii saatutunn David na; taa yii saah lee ubɔr u na.

¹¹ Aa nan puu tipuur ti saan cha ti bee fam na tii David ke, “M ga ŋa aajapɔɔn ubaa ubɔr, uma le ga paan aa pu ki ji nnaan.

¹² Aajapɔtiib yaa dii mi mbamɔm, ki kii ikaal i m di tii bi na kan, bijapɔtiib mu le ga nan gaa nnaan, ki li ye bibɔrb n‑yoonn mɔmɔk.”

¹³ Uwumbɔr lee Sionn la; u ban u di nima le ŋa udo;

¹⁴ u len ke, “Do le m ga li bi n‑yoonn mɔmɔk, do le m ban ke m li joo maanib.

¹⁵ M ga di liwangol limɔk Sionn aatiŋ ban na tii ki; m ga tii kaagiim tijikaar bi ji bab.

¹⁶ M ga ŋa maanyoor ŋa kaatotoorb aatuln mɔmɔk pu, le kaanib ga gaa mpopiin aalahn mpɔɔn pu.

¹⁷ Do le m ga ŋa David aayaabitiib ubaa ubɔrkpaan; do le m ga kaan ubɔr u m lee u na ki ti saa n‑yoonn mu kaa kpa ndoon na.

¹⁸ M ga jinn waadim inimɔɔn, le waanaan ma ga pɔɔk ki kan liwangol.”