Ilahn 119 - Uwumbɔr aagbaŋ

Uwumbɔr aakaal

¹ Binib bi aabimbin ŋan aan bi dii Uwumbɔr aakaal na kpa mpopiin.

² Binib bi joo waamɔboln ki kii tii u bisui mɔmɔk ni na kpa mpopiin,

³ baa tun taani ubaa; bi dii Uwumbɔr aasan la.

⁴ Uwumbɔr, aa di saakaal tii timi le ki mɔk timi ke ti li dii i mbamɔm.

⁵ M ba mak ke m li kpa naadii ki li joo saakaal.

⁶ M yaa kpa saamɔbon pu ntafaŋum kan, maan ji inimɔɔn daalbaadaal.

⁷ Buyoonn m bi bae saakaal nyaan ngbaan mbamɔm na kan, m ga di nsui mɔmɔk pak si.

⁸ M ga kii tii saakaal, kina pu na, taa di mi lii.

Saah ga kii Uwumbɔr aakaal pu na

⁹ Binib bi laa diin na yaa ban baabimbin li ŋan kan, see bi kii saakaal.

¹⁰ M joo nsui mɔmɔk le pɔɔni mbaa ke m li tun saatuln; taa cha m yii saakaal.

¹¹ M joo saakaal nsui ni, ke m taa tun si titunwanbir.

¹² Uwumbɔr, m pak si; kina pu na, mɔk mi saasan.

¹³ M ga ki gir len mpɔɔn pu saah tii ikaal i mɔmɔk na.

¹⁴ M gee ke m li dii saakaal ki jer ke m li kpa liwangosakpeln.

¹⁵ M bae saakaal, m moo lik saah mɔk mmɔkm pu na.

¹⁶ Saakaal tii mi mpopiin, maan suln saakaal bɔr.

Uwumbɔr aakaal aah kpa mpopiin pu na

¹⁷ Li kpa tiŋann min saatutunn pu, aan m li bi ki kii saah mɔk mi pu na.

¹⁸ Woln nnimbil aan m kan ibamɔnkpaan i bi saakaal ni na.

¹⁹ Maan yunn kitiŋ kee pu, kina pu na, taa di saakaal bɔr mi.

²⁰ Nnimbil man ke m li nyi saakaal n‑yoonn mɔmɔk.

²¹ Aa kae binib bi kpa kigaak na mbamɔm; ki puuni lir binib bi yii saakaal na pu.

²² Maah joo saakaal pu na, nyan mi baasiibil ni baalaar ni.

²³ Bitinjoob kuuni le ki kpokl m pu, le mma ga li bae saakaal.

²⁴ Saah mɔk mmɔkm pu na tii mi mpopiin; muma le ye maasusur.

Pɔɔn aabaa ki kii Uwumbɔr aakaal

²⁵ M lir le ki dɔ titan ponn ni, cha maamɔfal ki gir ni ke saah puu ke aa ga ŋa pu na.

²⁶ M kpiir maah tun pu na, le aa kii tii mi; mɔk mi saasan.

²⁷ Ter mi aan m bee saakaal aatataa, aan m li dakl lik saah tun litukpaan pu na.

²⁸ Mpombiin le nyaŋ mi kookoo; cha nwon pɔɔk ke saah nan puu ke aa ga ŋa pu na.

²⁹ Taa cha m yenn buen kinimbɔŋ wɔb, di saaŋann sakpenn mɔk mi saakaal.

³⁰ M kii ke m ga li si chob; m kpa ŋuntii ki tii saakaal.

³¹ Uwumbɔr, m dii saah mɔk pu na; taa cha m ji inimɔɔn.

³² M ga di lineen kii saakaal, ba pu? aa ga cha m moo bee yaatataa.

Ŋuntii aameel

³³ Uwumbɔr, mɔk mi saakaal aatataa, le m ga kii i n‑yoonn mɔmɔk.

³⁴ Kpiir saakaal aatataa mɔk mi, aan m kii tii i. M ga di nsui mɔmɔk joo i.

³⁵ Taa cha m nya saakaal aapuwɔb, ba pu? ima chee le m kani mpopiin.

³⁶ Cha m li kpa lineen saakaal pu ki jer liwangol.

³⁷ Taa cha ntafal li bi tiwan ni kaa kpa tinyoor na ni; saah puu pu na, li kpa m pu tiŋann.

³⁸ Li joo tipuur ti aa puu tii mi, saatutunn na, saapuur ti aa nan puu tii binib bi kii saamɔb na.

³⁹ Nyan mi ŋisiibil ŋi m san ŋi ijawaan na ni; saakaal ye ikaal kpaan la.

⁴⁰ M gee ke m joo saakaal; saabimbinyaan pu, tii mi limɔfapɔln.

Tii Uwumbɔr aakaal naadii

⁴¹ Uwumbɔr, mɔk mi saah gee mi pu na, ki gaa mi lii, saah nan puu ke aa ga ŋa pu na.

⁴² Le m ga ŋmaa gar binib bi seei mi na, ba pu? m tii saamɔboln naadii.

⁴³ Maamakl aah bi saakaal ponn ni pu na, cha m li ŋmaa len ibamɔn n‑yoonn mɔmɔk.

⁴⁴ M ga kii tii saakaal n‑yoonn mɔmɔk, ki ti saa n‑yoonn mu kaa kpa ndoon na.

⁴⁵ Maah pɔɔni mbaa ke m li joo saakaal na, nibaa aan muk mi maamɔfal ni.

⁴⁶ M ga di saakaal moon tii bibɔrb, kaan san inimɔɔn.

⁴⁷ Maah gee saakaal pu na, i tii mi lineen la.

⁴⁸ M gee saakaal ki pak i, m ga li dak i pu.

Uwumbɔr aakaal aapɔɔn

⁴⁹ Teer saah nan puu tipuur ti tii mi, saatutunn na; ti tii mi limakl.

⁵⁰ Buyoonn m nan bi falaa ni na m nan kpa mpopiin; ba pu? saah puu tipuur ti na nan tii mi limɔfal.

⁵¹ Bigaadam lik seeni mi n‑yoonn mɔmɔk la, le maa yii saakaal ki nyan ipuwɔb.

⁵² Uwumbɔr, m teer saakaal i bi n‑yoonn mu jer na pu, le i joo ni mi mpopiin.

⁵³ M yaa kan bibiindam bi bii saakaal kan, maaŋuul fiir la.

⁵⁴ N‑yoonn siib mu ponn ni m bi kitiŋ kee pu na, m di saakaal naan ilahn.

⁵⁵ Uwumbɔr, kinyeek kan, m teer saabɔr, le ki dak saakaal pu.

⁵⁶ M joo saakaal le ki kani maapopiin.

Di aabaa tii Uwumbɔr aakaal

⁵⁷ Uwumbɔr, sin baanja le ye tiwan ni m ban na, m puu ke m ga li joo saakaal.

⁵⁸ M joo nsui mɔmɔk mee si ke aa san mi kinimbaak ke saah puu ke aa ga ŋa pu na.

⁵⁹ M lik maabimbin suuna, le ki puu ke m ga li dii saakaal la.

⁶⁰ M kii saakaal kaan taan kpala.

⁶¹ Bibiindam pen mi kitaŋ la, le maan tee suln saakaal pu.

⁶² M fii kinyetaasiik le ki pak si, saakaal i bi chob na pu.

⁶³ M ye binib bi mɔmɔk tun saatuln ki kii saakaal na aajɔ la.

⁶⁴ Uwumbɔr, saageehm mu bi n‑yoonn mɔmɔk na gbii kitiŋ kee pu la; mɔk mi saakaal.

Uwumbɔr aakaal aah kpa tinyoor pu na

⁶⁵ Uwumbɔr, aa joo saah nan puu tipuur ti na, aa kpa tiŋann min saatutunn pu.

⁶⁶ Maah tii saakaal naadii pu na, tii mi saalan ni ichiin.

⁶⁷ Waahr aan aa nin daa ntafal na, m nan tun taani; tɔ, dandana ma kan, m kii saamɔb.

⁶⁸ Aa kpa tiŋann sakpen a. Mɔk mi saakaal.

⁶⁹ Binib bi kpa kigaak na geei inyamɔn paani mi, le m tee joo nsui mɔmɔk keei tii saakaal.

⁷⁰ Binib bimina aa kpa ŋuntii, le mma neen saakaal.

⁷¹ Maatafadaan nan ŋan tii mi la, ba pu? mu cha m bae saakaal.

⁷² Saah tii ikaal i na kpa tinyoor tii mi ki jer dulnyaa wee ni aamombil mɔmɔk.

Uwumbɔr aakaal aah bi chob pu na

⁷³ Sin le naan mi, ki cha m kpa limɔfal; tii mi nlan aan m di bae saakaal.

⁷⁴ M kii tii saah len pu na, kina pu le binib bi nyuŋni si na yaa kan mi kan, bi ga li kpa mpopiin.

⁷⁵ Uwumbɔr, m nyi ke saakaal ŋan, ki nyi ke saabamɔn pu le aa daa ntafal.

⁷⁶ Cha saageehm mu bi n‑yoonn mɔmɔk na sɔŋ nsui ke saah nan puu pu tii mi, saatutunn na.

⁷⁷ Maah neen saakaal pu na, san mi kinimbaak, ki tii mi limɔfal.

⁷⁸ Cha binib bi kpa kigaak na ji inimɔɔn baah geei inyamɔn i paani mi na pu; mma kan, m ga dakl suuna ki lik saakaal aatataa.

⁷⁹ Cha binib bi nyuŋni si ki nyi saakaal na dan m chee.

⁸⁰ Cha m li joo saakaal, saah ban pu na, ki nya nlirm aanimɔɔn ni.

Limeel li ban ŋŋmarm na

⁸¹ Uwumbɔr, maah kii si ke aa nan gaa mi lii pu na cha nwon mɔmɔk kpo a; m di maagaakii ŋa saabɔr ni la.

⁸² Maah lik ki ban tiwan ni aa puu ke aa ga ŋa na pu na le nnimbil ti gur wu, le m baa ke, “Bayoonn aan aa ga ter mi?”

⁸³ Maa ki bi tibɔr tibaa ni, ke lidabuul li kpa nween na la; tɔ, m mu aa tee suln saakaal bɔr.

⁸⁴ M kiir si ki ti bak a; bayoonn aan aa ga daa binib bi muk mi na aatafal?

⁸⁵ Binib bi kpa kigaak, kaa dii saakaal na, gbii ibuu bil mi.

⁸⁶ Unii ga ŋmaa nyii saakaal pu ki fii sil; binib joo inyamɔn le muk mi, kina pu na, ter mi.

⁸⁷ Ni gur pɔkaa kina bi ku mi a, le m beenin joo saakaal.

⁸⁸ Li kpa m pu tiŋann saageehm mu bi n‑yoonn mɔmɔk na pu, nima kan, m ga ŋmaa li joo saakaal.

Li kpa naadii Uwumbɔr aakaal pu

⁸⁹ Uwumbɔr, saamɔboln ga li bi ki ti saa n‑yoonn mu kaa kpa ndoon na; li bi paacham kaa kpa ndoon.

⁹⁰ Saabamɔn ga li bi ki ti saa n‑yoonn mu kaa kpa ndoon na; aa baa kitiŋ siin libubaan ni, le kaan ki ŋmaa foor.

⁹¹ Saakaal pu le tiwan mɔmɔk beenin bi ki nan saa din wee, ba pu? ni mɔmɔk ye saatutum la;

⁹² Maapopiin aah nyan ni saakaal ni na, kina pu le maafalaa aa ku mi.

⁹³ Saakaal pu, le maa kpo, kina pu na, maan ŋmaa suln i bɔr.

⁹⁴ Sin le yeh mi, gaa mi lii. M pɔɔni mbaa ke m li joo saakaal.

⁹⁵ Bibiindam kii mi ke bi ku mi la, le m ga li dakl lik saakaal aatataa.

⁹⁶ M bee ke tiwan mɔmɔk kpa naadoon; le saakaal ma aa kpa ndoon.

Li gee Uwumbɔr aakaal

⁹⁷ M gee saakaal sakpen a. M dakl i pu le nwiin ti lir.

⁹⁸ Saakaal bi m chee n‑yoonn mɔmɔk la, ki cha m moo kani nlan jer maadim.

⁹⁹ Maah dakl lik saakaal aatataa na, m moo beer tiwan aatataa jer binib bi mɔk mi na mɔmɔk.

¹⁰⁰ Maah dii saakaal na, m kpa nlan sakpen ki jer bininkpiib.

¹⁰¹ Maah ban ke m kii saamɔboln na m yii mbimbin mu kaa ŋan na mɔmɔk.

¹⁰² Sin aabaa aah ye maamɔmɔkr na, maa lik saakaal fam.

¹⁰³ Saakaal mɔ sakpen a, i mɔ jer tisiir.

¹⁰⁴ M kani nlan saakaal chee pam, kina pu na, maa gee mbimbin mumɔk kaa ŋan na.

Uwumbɔr aakaal aah kpa nwiihn mu na

¹⁰⁵ Saamɔboln ye karyaa u mɔk mi nsan na la, le ki wiin maasan ni.

¹⁰⁶ M ga li joo maapuur kpaan ti m puu ke m ga li dii saakaal bamɔnn na.

¹⁰⁷ Uwumbɔr, maafalaa nyaŋ sakpen a; cha m li kpa limɔfal saah nan puu ke m ga li kpa pu na.

¹⁰⁸ Uwumbɔr, gaa maah tii si idoon i na, ki mɔk mi saakaal.

¹⁰⁹ M kii n‑yoonn mɔmɔk ke m di maamɔfal pa talmaa; maan suln saakaal.

¹¹⁰ Bibiindam pen mi kitaŋ la, le maa yii saakaal.

¹¹¹ Saakaal le ye maawangol ki ti saa n‑yoonn mu kaa kpa ndoon na; ima le ye maapopiin.

¹¹² M nyan sil ke m li dii saakaal ki ti saa maakundaal.

Uwumbɔr aakaal aah ŋan pu na

¹¹³ M nan binib bi kaa di bisui mɔmɔk tii si na, le ki tee gee saakaal ma.

¹¹⁴ Sin le ye maakikiir, m kpa limakl saah len pu na pu.

¹¹⁵ Nimi titunwanbirdam, siir m chee man. M ga li dii Maawumbɔr aakaal la.

¹¹⁶ Saah nan puu pu na, tii mi mpɔɔn, aan m li kpa limɔfal; taa cha maamakl bee fam.

¹¹⁷ Chuu mi, aan m li bi ŋŋmarm ni, ki li kpa ŋuntii saakaal pu.

¹¹⁸ Unii umɔk yii saakaal na, aa mu yii uma la; le baabeebee aakpokl na ye fam.

¹¹⁹ Aa ŋani bibiindam mɔmɔk ke timoor na la, kina pu le m gee saakaal.

¹²⁰ M san sin le ijawaan; saakaal pu le ijawaan joo mi.

Taa nya Uwumbɔr aakaal aapuwɔb

¹²¹ M tun tiwan ni ŋan ki si chob na, taa di mi tii maadim,

¹²² Puu ke aa ga ter saatutunn; taa cha binib bi kpa kipupuk na li muk mi.

¹²³ Maah lik ki ban ke aa gaa mi lii ke saah nan puu pu na le cha nnimbil ti wu.

¹²⁴ Li joo mi, saatutunn, ke saageehm na aah ban pu na, ki mɔk mi saakaal.

¹²⁵ M ye saatutunn la; tii mi nlan aan m li nyi saakaal aatataa.

¹²⁶ Uwumbɔr, binib aah yii saakaal pu na, ni ŋeer ke aa fii sil.

¹²⁷ M gee saakaal ki jer salmaa u bi pun u mmii ni ki nyan waajɔŋ na.

¹²⁸ Kina pu na, m dii saakaal mɔmɔk; le kaa gee nsan mumɔk kaa ŋan na.

Uwumbɔr aakaal aadiim aaneen

¹²⁹ Saakaal ye ikaal kpaan la; m di nsui mɔmɔk le kii tii i.

¹³⁰ Saakaal aatataa tii inimbiwoln la, le ki tii maanyidam nlan.

¹³¹ Maah kpa saakaal pu lineen pu na, le m gur ka waa mmɔb ki fuur yiŋni.

¹³² Fenn ni m chee ki san mi kinimbaak ke saah san binib bi gee si na kinimbaak pu na.

¹³³ Saah nan puu pu na, taa cha m lir, ki taa cha kinimbɔŋ nyaŋ mi.

¹³⁴ Nyan mi binib bi muk mi na aaŋaal ni, aan m ŋmaa dii saakaal.

¹³⁵ Di saanyoor gbii mi ki mɔk mi saakaal.

¹³⁶ Binib aah yii saakaal pu na cha m wii, le maanyunyunn ti puu ke limɔɔl na.

Uwumbɔr aakaal aah bi chob pu na

¹³⁷ Uwumbɔr, saabimbin ŋan la, le saakaal si chob.

¹³⁸ Saah tii ikaal i na ŋan le ki si chob.

¹³⁹ Maadim aah kaa lik faar saakaal na, le ni wu mponn ni ke mmii na.

¹⁴⁰ Saah puu tipuur ti na aa kpeln. Min u ye saatutunn na gee ti sakpen a.

¹⁴¹ Maa ye unikpaan, le bi lik seen mi, m mu aa tee suln saakaal bɔr.

¹⁴² Saabimbinyaan ga li bi n‑yoonn mɔmɔk, le saakaal ye mbamɔn n‑yoonn mɔmɔk.

¹⁴³ Tibɔr muk mi sakpen, le saakaal ma joo ni mi mpopiin.

¹⁴⁴ Saakaal si chob n‑yoonn mɔmɔk la; tii mi nlan mu m ga li joo beer tiwan aatataa na, ki cha m li kpa limɔfal.

Ŋŋmarm aameel

¹⁴⁵ M yin si ni maalandak mɔmɔk la; Uwumbɔr, pel m chee, aan m dii saakaal.

¹⁴⁶ M yin si la; gaa mi lii, aan m li joo saakaal.

¹⁴⁷ M fii lichakpitaawoln le ki yin si ki ban nterm; maamakl bi saah puu tipuur ti na ni la.

¹⁴⁸ M yaa dɔ kinyeek kan, m dɔ waa la, ke m dakl suuna ki lik saakaal aatataa.

¹⁴⁹ Uwumbɔr, saageehm aah bi n‑yoonn mɔmɔk na, pel m chee; san mi kinimbaak, ki gaa maamɔfal lii.

¹⁵⁰ Binib bi kaa joo saakaal kpala na kpokl m pu, ki moo foor duuni mi la.

¹⁵¹ Uwumbɔr, le sin le bi gbɔk mi, le saakaal mɔmɔk aa kpelni.

¹⁵² N‑yoonn mu jer na le m nan bae saakaal; aa siin i ke i li bi n‑yoonn mɔmɔk la.

Nterm aagaŋ

¹⁵³ Maah kaa yii saakaal na, lik maah ji falaa pu na, ki gaa mi lii.

¹⁵⁴ Ter mi maabɔr ni, ki gaa mi lii, saah nan puu pu na, gaa mi lii.

¹⁵⁵ Bibiindam aah yii saakaal na, saan gaa bi lii.

¹⁵⁶ Uwumbɔr, le saanimbaasaln nyaŋ sakpen a; san mi kinimbaak ki gaa mi lii.

¹⁵⁷ M kpa bidim, ni binib bi muk mi na sakpen, tɔ, m tee beenin dii saakaal.

¹⁵⁸ Bibɔmbɔtukb ngbaan aah kaa dii saakaal na, m yaa kan bi kan, ni bii nsui la.

¹⁵⁹ Uwumbɔr, lik maah gee saakaal pu na. Saageehm aa kpelni, kina pu na, gaa mi lii.

¹⁶⁰ Saamɔbon mɔmɔk ye ibamɔn la, le saakaal mɔmɔk aa kpa ndoon.

Di aabaa tii Uwumbɔr aakaal

¹⁶¹ Bipɔɔndam joo inyamɔn i kaa kpa tataa na le tak mi, le mma pak saakaal.

¹⁶² Saah puu tipuur ti na pu le m kpa mpopiin ke unii u pii liwangol na la.

¹⁶³ Maa gee ke m kan inyamɔn kpala, le ki tee gee saakaal ma.

¹⁶⁴ Saakaal i bi chob na pu, le m dooni si nfum mulole liwinbaal.

¹⁶⁵ Binib bi gee saakaal na bi lifuur ni la, le nibaa aa bi ki ga nyaŋ bi.

¹⁶⁶ Uwumbɔr, m kii si le ke aa nan gaa mi lii, le ki ŋani saah ban pu na.

¹⁶⁷ M gee saakaal ni nsui mɔmɔk, le ki dii i.

¹⁶⁸ M dii saakaal ni saah mɔk mi pu na; aa kani maah ŋani tiwan ni mɔmɔk na.

Limeel li ban nterm na

¹⁶⁹ Uwumbɔr, cha maaterm aawiil pii si. Saah nan puu pu na, tii mi nlan mu m ga li joo beer tiwan aatataa na.

¹⁷⁰ Saah nan puu pu na, ŋun maameel, ki gaa mi lii.

¹⁷¹ Saah mɔk mi saakaal na, m ga li pak si n‑yoonn mɔmɔk.

¹⁷² Saakaal aah bi chob pu na, m ga di i gaa ilahn.

¹⁷³ Maah dii saakaal pu na, gor n‑yoonn mɔmɔk ki ter mi.

¹⁷⁴ Uwumbɔr, m kiir buyoonn aa ga gaa mi lii na, ki ti bak a. Saakaal ponn ni le m kani mpopiin.

¹⁷⁵ Tii mi limɔfal, aan m pak si; cha saakaal ter mi.

¹⁷⁶ M chuun yiini ke upiih u wɔŋ na la; maah kaa yii saakaal pu na, dan nan ban kan mi, saatutunn.