Ilahn 118 - Uwumbɔr aagbaŋ

Linyaŋ aadoon aameel

¹ Uwumbɔr aah kpa tiŋann pu na, ni li dooni u man; waageehm bi n‑yoonn mɔmɔk.

² Cha Israel aanib len ke, “Waageehm bi n‑yoonn mɔmɔk.”

³ Cha Uwumbɔr aatotoorb len ke, “Waageehm bi n‑yoonn mɔmɔk.”

⁴ Cha binib bi mɔmɔk dooni u na len ke, “Waageehm bi n‑yoonn mɔmɔk.”

⁵ Buyoonn nsui nan bii na, le m nan yin Uwumbɔr, le u nan kii maayim ki gaa mi lii.

⁶ Uwumbɔr bi m chee, kina pu na, maan san ijawaan; ubaa aan ŋmaa ŋa mi nibaa.

⁷ Uwumbɔr le ye u ter mi na, le m ga kan maadim aah ga lir pu na.

⁸ Aa yaa mak Uwumbɔr pu kan, ni ŋan jer ke aa li mak unibɔn pu.

⁹ Aa yaa mak Uwumbɔr pu kan, ni ŋan jer ke aa li mak biyidam pu.

¹⁰ Bidim pam le nan mann goln mi; le m nan di Uwumbɔr aapɔɔn doo bi mɔmɔk.

¹¹ Bi nan mann goln mi ŋipepel mɔmɔk, le m di Uwumbɔr aapɔɔn doo bi mɔmɔk.

¹² Bi nan san gonni mi ke inangbee na la, le bi mɔmɔk wun mala ke mmii aah wu ikokon pu na; m nan di Uwumbɔr aapɔɔn le doo bi.

¹³ Bi nan di tijar le tak mi ki ban bi nyaŋ mi, le Uwumbɔr tee ter mi.

¹⁴ Uwumbɔr tii mi mpɔɔn sakpiin, u gaa mi lii.

¹⁵ Li pel Uwumbɔr aanib aakookoo yaan ponn ni linyaŋ aapopiin aafuuk aah nyani pu na ke, “Uwumbɔr di waapɔɔnsakpiin na nyaŋ;

¹⁶ waapɔɔn joo ni timi linyaŋ; waapɔɔnsakpiin mu u joo to butɔb na le nyaŋ kina.”

¹⁷ Maan kpo, m ga li kpa limɔfal, le ki moon Uwumbɔr aah tun pu na aabɔr.

¹⁸ U daa ntafal sakpen a; u mu aa tee cha m kpo.

¹⁹ Chuu piir Uwumbɔr Aadichal aabisamɔi tii mi; m ga koo li ponn ni le ki ti doon u.

²⁰ Uwumbɔr aabisamɔb sɔ; binib bi aabimbin ŋan na baanja le ga ŋmaa koo ni.

²¹ Uwumbɔr, aa ŋun maayim pu ki tii mi linyaŋ, nima pu le m pak si.

²² Litakpal li bidimaab yii li na, lima le ye litakpajal.

²³ Uwumbɔr le ŋa kina, li ni gar timi pam.

²⁴ Uwumbɔr aanyaŋ aawiin daal le na; cha ti li kpa mpopiin, cha ti li mɔɔni man.

²⁵ Uwumbɔr, gaa timi lii. Uwumbɔr, tii timi linyaŋ.

²⁶ Tinyoor bi unii u choo Uwumbɔr aayimbil pu na. Ti bi Uwumbɔr Aadichal ni le ki mee waanyoor ŋani nimi pu.

²⁷ Uwumbɔr ye Tidindaan la, u kpa ti pu tiŋann. Bar isubon ŋa niŋaal ni man, ki piin kitork aajim ngbaan, ki chuun mann goln kitork aabimbiln.

²⁸ Aa ye Maawumbɔr la, le m dooni si, m ga moon saah kpa mpɔɔn pu na.

²⁹ Uwumbɔr aah kpa tiŋann pu na, ni li dooni u man. Waageehm bi n‑yoonn mɔmɔk.