Ilahn 116 - Uwumbɔr aagbaŋ

Uja u nyan nkun ni na aah pak Uwumbɔr pu na

¹ Uwumbɔr aah ŋun maayim pu na, le m gee u, u pel maameel,

² n‑yoonn mumɔk m yin u na kan, u pel m chee la.

³ Nkun aanimaln nan mann goln mi; le likaakul aajawaan gob mi siin; ijawaan sakpiin le nan chuu mi,

⁴ le m yin Uwumbɔr, m nan bui ke, “Uwumbɔr, m gaŋ si, gaa mi lii.”

⁵ Uwumbɔr san kinimbaak le ki kpa tiŋann; timi Aawumbɔr ye unimbaasaln la.

⁶ Uwumbɔr le kii binib bi kaa kpa nterm na; maah nan bi limukl ni na, u nan nyan mi.

⁷ Uwumbɔr aah kpa m pu tiŋann pu na, le m kpa nsuudoon.

⁸ Uwumbɔr nyan mi nkun ni; u pir maanyunyunn, kaa cha m lir.

⁹ Kina pu na, m bi Uwumbɔr aanimbiin ni le dulnyaa aanib ponn ni.

¹⁰ Buyoonn m nan bui ke, “M doo kookoo a” na, m nan beenin mak u pu,

¹¹ hali ijawaan aah nan joo mi aan m bui ke, “Taa ki tii ubaa naadii” na, m nan beenin mak u pu.

¹² Ba aan m ga di tii Uwumbɔr, waaŋann sakpenn tee pu?

¹³ Uwumbɔr aah gaa mi lii pu na, m joo ni ndaan aapiin ki nan dooni u.

¹⁴ Waanib mɔmɔk aanimbil ni le m ga tii u maah puu ke m ga tii u ni na.

¹⁵ Uwumbɔr aanii ubaa yaa kpo kan, ni wu u sakpen.

¹⁶ Uwumbɔr, m ye saatutunn la; m tun saatuln ke nna aah nan tun pu na la. Aa nyan mi nkun ni.

¹⁷ M ga tii si idoon aapiin, ki di maameel tii si.

^18-19 Saadichal li bi Jerusalem ponn ni na, saanib mɔmɔk aanimbil ni le m ga tii si maah puu ke m ga tii si tiwan ni na. Pak Uwumbɔr man.