Ilahn 115 - Uwumbɔr aagbaŋ

Uwumbɔrbaan u ye mbamɔn na

¹ Uwumbɔr, sin baanja, sin baanja, kaa ye timi, le ti ga tii kipak; ba pu? aa kpa ngeehm n‑yoonn mɔmɔk, ki ŋani saah puu ke aa ga ŋa pu na.

² Ŋitimbol aa kpa nsan ke ŋi baa timi ke, “Nimi Aawumbɔr bi la chee?”

³ Timi Aawumbɔr bi paacham la; u ŋani waah gee pu na.

⁴ Bima kan, bi di tikunabr ni salmaa le naan baawaa, unibɔn aaŋaal le naan ŋi.

⁵ Ŋi kpa imɔi le kaa tee ŋmaa len, ki kpa ŋinimbil, kaa tee waa.

⁶ Ŋi kpa ŋitafal, kaa tee ŋun, ki kpa ŋimɔfal, kaa tee ŋun nnunun.

⁷ Ŋi kpa iŋaal, kaa tee ŋmaa chur tiwan, ki kpa ŋitaa, kaa tee ŋmaa chuun; ŋaan ŋmaa faa kifuuk.

⁸ Cha binib bi mɔmɔk naan ŋi ki kpa ŋi pu limakl na li gur bi ke ŋiwaa ŋi bi naan na.

⁹ Nimi Israel aanib, li kpa Uwumbɔr pu limakl man. U ter nimi, le ki kii nimi.

¹⁰ Nimi Uwumbɔr aatotoorb, li kpa limakl Uwumbɔr pu man. U ter nimi, le ki kii nimi.

¹¹ Nimi bimɔk dooni u na, li kpa limakl Uwumbɔr pu man. U ter nimi, le ki kii nimi.

¹² Uwumbɔr teer ti bɔr le ki ga ŋa waanyoor ŋa ti pu; u ga ŋa waanyoor ŋa Israel aanib pu ki ŋa waatotoorb mɔmɔk pu waanyoor.

¹³ U ga ŋa waanyoor ŋa binib bi mɔmɔk nyuŋni u na pu, binikpaam ni biwaatiib mɔmɔk pu.

¹⁴ Uwumbɔr tii nimi ni niyaabitiib bibilb.

¹⁵ Uwumbɔr u naan paacham ni kitiŋ na ŋa waanyoor ŋa ni pu.

¹⁶ Uwumbɔr baanja le yeh paacham, le u tee di kitiŋ tii unibɔn.

¹⁷ Bitekpiib le aa pak Uwumbɔr, unii umɔk sunn buen kitekpiitiŋ ni na aa pak u,

¹⁸ le timi bi fu na ma ga di idoon tii u; ti ga doon u dandana ni n‑yoonn mɔmɔk. Pak Uwumbɔr man.