Ilahn 114 - Uwumbɔr aagbaŋ

Lakr‑jer aajim aalahn

¹ Israel yaab aah nan nyan Ijipt aatiŋ ni na, bima Jakob aayaabitiib aah nan nyan kiwɔwɔtiŋ ngbaan ni buyoonn na,

² le Juda yaab nan kpaln Uwumbɔr aanib bi u bi bikaasisik ni na, Israel yaab nan kpaln Uwumbɔr yaab.

³ Nnyusakpem Mamam nan lik le ki san; le Jɔɔdann Aamɔɔl sil kaa ki puu.

⁴ Ŋijoo nan yuk ja ja ke iŋoob na; le ŋigongon yuk ke ipihbi na.

⁵ Nnyunsakpem, ba nan ŋa aan aa san? Jɔɔdann aamɔɔl, ba nan ŋa aan aa sil kaa ki puu?

⁶ Nimi ŋijoo, ba nan ŋa aan ni yuk ja ja ke iŋoob na? Nimi ŋigongon, ba nan ŋa aan ni yuk ke ipihbi na?

⁷ Kitiŋ, li jii; ba pu? Uwumbɔr choo, Uwumbɔr u tiyaaja Jakob mu nan dii u na,

⁸ Uwumbɔr u kpelni ŋitakpal ŋani nnyun, ki kpelni ŋijootakpal ŋani inyunbun i puu na, li jii uma aanimbiin ni.