Ilahn 113 - Uwumbɔr aagbaŋ

Uwumbɔr aaŋann aapak

¹ Pak Uwumbɔr man. Nimi Uwumbɔr aatutum, pak waayimbil man.

² Bi li pak waayimbil n‑yoonn mɔmɔk.

³ Pak Uwumbɔr aayimbil man, ki nya liwipuul ki ti saa liwilir.

⁴ Uwumbɔr le ye ŋitimbol mɔmɔk aajojoor; waah kpa kipak ki na jer paacham.

⁵ Ubaa aa bi ke Tidindaan Uwumbɔr na. U koo paacham paacham la,

⁶ le ki tee gbuuni taab ki lik ni kitaapaak ni kitiŋ.

⁷ U fiini bigiim bi dɔ titan ni na siini paacham; ki nyani binib bi kaa kpa tiwan na baanimbaak ni,

⁸ ki joo bi ŋani biyidam aajɔtiib, binib bi ye waanib na aajojoob aajɔtiib.

⁹ U nyuŋni upii u kaa kpa ubo na waadichal ni; u tii u mbim, le usui piir. Pak Uwumbɔr man.