Ilahn 112 - Uwumbɔr aagbaŋ

Uninyaan aapopiin

¹ Pak Uwumbɔr man. Unii umɔk nyuŋni Uwumbɔr ki gee ke u li joo waakaal na kpa mpopiin.

² Uninyaan aabim ga li kpa mpɔɔn kitiŋ pu; uyaabitiib ga kan tinyoor.

³ Waadichal ga li kpa liwangol ni ŋimombil, le u ga li ye uwankpadaan n‑yoonn mɔmɔk.

⁴ Bininyaam yaa bi mbɔmbɔɔn ni kan, ni ye nwiihn ŋmeen la; ni ye nwiihn ki tii binib bi san kinimbaak, ki kpa tiŋann, ki si chob na.

⁵ Unii u pinn biken tiwan, kaa san ijawaan, kaa kpa beebee waatuln ni na kpa mpopiin.

⁶ Uninyaan aan ŋmaa lir daalbaadaal; bi ga li teer u bɔr n‑yoonn mɔmɔk.

⁷ Bi yaa tuk u nsuubiin aabɔr kan, naa chur u ijawaan; u kpa gaakii u pɔɔ na, le ki kpa Uwumbɔr pu limakl.

⁸ Waa san ijawaan, le nibaa aa muk u; u ga sil kan ke waadim lir.

⁹ U tii binib bi kaa kpa na, ni usui mɔmɔk la, le waaŋann aa kpa ndoon; u ga li kpa mpɔɔn ni kipak.

¹⁰ Bibiindam kani kina, le baaŋuul fiir; bi gbee ŋiningbee le ki siir mala; baamakl mɔmɔk doo a.