Ilahn 111 - Uwumbɔr aagbaŋ

Uwumbɔr aapak aalahn

¹ Pak Uwumbɔr man. M ga di nsui mɔmɔk pak Uwumbɔr, waanib aah kuun nin chee na.

² Uwumbɔr aah tun ŋitun ŋi na nyaŋ a. Binib bi mɔmɔk aasui piir ŋi pu na ban ke bi bee ŋaatataa.

³ Waah tun ni mɔmɔk na kpa kipak ni nnaan aapɔɔn la; waabimbinyaan aa kpa ndoon.

⁴ Uwumbɔr cha ti teer waatukpaan na pu, u kpa tiŋann le ki san kinimbaak mu.

⁵ U tii binib bi nyuŋni u na tijikaar; waa suln waah puu tipuur ti na bɔr.

⁶ Waah gaa biwɔwɔm aatiŋ tii waanib pu na, le u mɔk bi waapɔɔn.

⁷ U bi chob le ki tun waatun mɔmɔk waah puu ke u ga ŋa pu na; aa ga ŋmaa li kpa waakaal mɔmɔk pu kipupuk.

⁸ Waakaal aa kpa ndoon; yaabimbin ŋan le ki ye ibamɔn.

⁹ U gaa waanib lii ki puu tipuur ti kaa kpa ndoon na tii bi. U bi chain le ki kpa mpɔɔn.

¹⁰ Aa yaa ban aa li kpa nlan kan, nyuŋ Uwumbɔr; u tii binib bi keei waamɔb na nlan. Ni ŋan ke ti pak u n‑yoonn mɔmɔk.