Ilahn 110 - Uwumbɔr aagbaŋ

Uwumbɔr, ni waah lee ubɔr u na

¹ Uwumbɔr bui ndindaan ke, “Kaln ŋŋangii wɔb ki ti saa buyoonn m ga di saadim mɔmɔk ŋa aataapɔtan ni na.”

² Uwumbɔr ga taln saanaan aapɔɔn ki nya Sionn ni. U ki len ke, “Li ye saadim aajojoor.”

³ Nwiin mundaal aa ga tak saadim na, saanib ga nya sil ki ter si bibaa pu la. Saanachipɔm ga dan aa chee ŋijoo ŋi bi chain na pu ke kichakpiik ni aamaln na la.

⁴ Uwumbɔr puu tipuukpaan, kaan kpeln ti ke, “Aa ga li ye utotoor ki ti saa n‑yoonn mu kaa kpa ndoon na ke Melkisedek aah nan ye pu na la.”

⁵ Tidindaan bi aaŋangii wɔb; waaŋuul yaa fii kan, u ga nyaŋ bibɔrb.

⁶ U ga ji ŋitimbol tibɔr, ki cha baah to butɔb nin chee na kpaln ŋinikpol ŋmeen; u ga nyaŋ bibɔrb, kitiŋ kee mɔmɔk pu.

⁷ Ubɔr ngbaan ga nyu nnyun nkpen mu bi nsan chee na, aan ki moo pɔɔk ki kan linyaŋ.