Ilahn 108 - Uwumbɔr aagbaŋ

Limeel li ga li kii si saadim chee na

¹ Uwumbɔr, m kpa limakl. M ga gaa ilahn ki pak si. M ga fii sil,

² ki ga moo pel maabar. M ga gaa ilahn lichakpitaawoln.

³ Uwumbɔr, m ga doon si ŋitimbol ni. M ga pak si binib ni.

⁴ Saageehm mu bi n‑yoonn mɔmɔk na chaar jer paacham; le saaŋann fuur kitaapaak.

⁵ Uwumbɔr, mɔk saah pɔɔ sakpen pu na kitaapaak ni, ki mɔk saapak kitiŋ kee mɔmɔk pu.

⁶ Ŋun maameel, ki di saapɔɔn gaa timi lii, aan saah gee binib bi na ŋmar.

⁷ Uwumbɔr bi waadichal li bi chain na ni ki len ke, “M ga di linyaŋ yakr Sekem aatiŋ, ki yakr Sukof aafataŋ tii maanib.

⁸ Gilead ni Manase aatim ye min yaan la, Efraim aatiŋ le ye maakur aayikpupuk, le Juda ye maabɔr aajaangbeek.

⁹ Moab aatiŋ le ga li ye maasapeek; m ga di maanaatak di mee paan Edom pu, ki mɔk ke ki ye min mbaa aatiŋ la. M ga nyaŋ Filistia aatiŋ le ki teen mpɔɔn pu.”

¹⁰ Uwumbɔr, ŋma ga di mi buen kitiŋ ki bi maa ŋigon gob ki na ponn ni? Ŋma ga cheen mi Edom aatiŋ ponn ni?

¹¹ Aa sil yii timi la aa? Saan ki dii timi aajab buen butɔb ni ii?

¹² Ter timi, timi aadim chee; unibɔn aaterm aa ye nibaa.

¹³ Uwumbɔr yaa bi ti chee kan, ti ga nyaŋ, u ga nyaŋ timi aadim.