Ilahn 107 - Uwumbɔr aagbaŋ

Uwumbɔr aaŋann aapak

¹ “Uwumbɔr aah kpa tiŋann pu na, ni di idoon tii u, waageehm aa kpa ndoon.”

² Nimi bi mɔmɔk kan waaŋmarm na, di tibɔbaan ngbaan giin pak u man. U gaa nimi, nimi aadim chee lii,

³ ki nyan nimi ntiyayam ni ki giin ni nimi, nimi aatiŋ ni; u nyan ni nimi liwipuul ni liwilir wɔb, ki nyan ni nimi ŋŋangan ni ŋŋangii wɔb.

⁴ Bibaa nan chuun yiini nteersakpiin mu kaa kpa isan na, kaa kan kitiŋ ki ponn ni bi ga li koo na.

⁵ Nkon ni nnyunyuu nan chuu bi, le biwon mɔmɔk yɔl.

⁶ Le baamukl ni, bi yin Uwumbɔr, le u nyan bi baafalaa ngbaan ni.

⁷ U nan di bi buen kitiŋ ki ponn ni bi ga ti li koo na.

⁸ Ni ŋan ke bi doon Uwumbɔr waageehm mu bi n‑yoonn mɔmɔk na pu, ni ŋitukpaan ŋi u tun tii bi na pu.

⁹ U tii nnyunyuu aah joo binib bi na nnyun, le ki tii nkon aah joo binib bi na tijikaar ti ŋan na.

¹⁰ Binib bibaa nan bi mpombiin, ni mbɔmbɔɔn ni, ki ye biyom, ki bi tikululn aafalaa ni,

¹¹ ba pu? bi nan yii Uwumbɔr u kaa kpa ŋeen aatɔ na aakaal, ki yii waah mɔk bi pu na.

¹² Le litupɔɔl nan cha bi diŋ; bi nan lir, le ubaa aa bi ki ter bi.

¹³ Le baamukl ponn ni bi yin Uwumbɔr, le u nyan bi baafalaa ngbaan ni.

¹⁴ U nan nyan bi baapombiin ni mbɔmbɔɔn ni, ki geei baakululn na yuk yuk.

¹⁵ Ni ŋan ke bi di idoon tii Uwumbɔr, waageehm mu bi n‑yoonn mɔmɔk na pu, ni ŋitukpaan ŋi u tun tii bi na pu.

¹⁶ U gbaa wiil tikumann aajaaleŋ mam, ki gbaa wɔi tikur aadɔ.

¹⁷ Binib bibaa nan ye bijɔrb, le ki ji baatunwanbir aafalaa le baabiin aatun pu;

¹⁸ baa nan gee ke binimbil kan tijikaar, le nkon ti ban mu ku bi.

¹⁹ Le baamukl ponn ni bi yin Uwumbɔr, le u nyan bi baafalaa ni.

²⁰ U nan di waamɔboln le tii bi laafee, ki nyan bi nkun ponn ni.

²¹ Ni ŋan ke bi di idoon tii Uwumbɔr, waageehm mu bi n‑yoonn mɔmɔk na pu, ni ŋitukpaan ŋi u tun tii bi na pu.

²² Ni ŋan ke bi di kitork aapiin tii u idoon, ki di mpopiin aalahn len waah tun pu na mɔmɔk.

²³ Bibaa nan koo iŋɔi ni ki puur nnyusakpem, nnyusakpem ponn ni, le baajikaar nan nyan ni.

²⁴ Bi kan Uwumbɔr aah ga ŋmaa tun waatukpaan ŋi nnyusakpem pu na.

²⁵ U nan di umɔb le len, le libusakpeln piin ki bi daar le ki fiin tinyunkpenn.

²⁶ Iŋɔi nan fii paacham paacham ki gir nan lir nnyonyoon ponn ni, kina aanimaln ponn ni le biŋɔŋaab aataakpab yɔl.

²⁷ Biwon nan gbaa, le bi chuun gbeer ke bidagbiirb na, baah nan kpa nlan mu na bee fam.

²⁸ Le baamukl ponn ni bi yin Uwumbɔr, le u nyan bi baafalaa ni.

²⁹ U nan cha kitaabuŋ ŋmin chii, le tinyunkpenn doon suuna.

³⁰ Bisui nan piir kina pu, le u cha bi di baaŋɔi ti fuu baah cha nin chee na.

³¹ Ni ŋan ke bi di idoon tii uma Uwumbɔr, waageehm mu bi n‑yoonn mɔmɔk na pu, ni ŋitukpaan ŋi u tun tii bi na pu.

³² Ni ŋan ke bi moon waah kpa mpɔɔn pu na, kinipaak aah kuun nin chee na, ki pak u bininkpiib aakuun ni.

³³ Uwumbɔr cha ŋimɔɔ foor pel pel ki kuur, ki cha inyunbun aa ki bun.

³⁴ U cha kitiŋ ki kpa tijikaar na kpaln nteersakpiin, bibiindam bi koo nima chee na pu.

³⁵ U kpeln nteersakpiin ŋa tibɔr ti kpa nnyun na ki cha kitikuun kpaln inyunbun i puu na aatiŋ.

³⁶ U cha nkon aah joo binib bi na kun nima chee, le ki maa kitiŋ ki koo nima.

³⁷ Bi nan kon ikpaakon ki ŋum ŋisubil aasui ki nan kan tijikaar sakpen.

³⁸ U nan ŋa waanyoor ŋa waanib pu, le bi ma mbim pam, ki cha baawakor moo pɔr.

³⁹ Bidim aah nan nyaŋ Uwumbɔr aanib ki joo mbiin ni falaa jinni bi inimɔɔn ni na,

⁴⁰ u nan lik seen binib bi muk bi na, ki cha bi chuun yiini nteersakpiin mu kaa kpa isan na ponn ni.

⁴¹ Tɔ, u nan nyan binib bi kaa kpa na baanimbaak ni, ki cha baadichal pɔr ke ipiih na.

⁴² Binib bi aabimbin ŋan na kani kina, le ni mɔ bi, le bibiindam ma ŋmin chii.

⁴³ Cha binib bi kpa nlan na li dakl lik timina; Cha bi dakl lik Uwumbɔr aageehm mu bi n‑yoonn mɔmɔk na.