Ilahn 106 - Uwumbɔr aagbaŋ

Uwumbɔr aah kpa tiŋann waanib pu pu na

¹ Pak Uwumbɔr man. Doon Uwumbɔr man, ba pu? u kpa tiŋann; waageehm aa kpa ndoon.

² Ŋma ga ŋmaa bee waah tun ŋitukpaan ŋi na? Kipak kibaa aa bi ki ga ŋeer u.

³ Binib bi keei waamɔb ki ŋani ni ŋan na n‑yoonn mɔmɔk na kpa mpopiin la.

⁴ Uwumbɔr, buyoonn aa ban aa ter saanib na kan, aa teer mbɔr; aa cha m li bi binib bi ponn ni aa gaa lii na.

⁵ Cha m kan saah tii saanib liwangol li na, ki mu kan mpopiin mu aa di tii saatimbol na, ki kan binib bi ye saanib na aapopiin aamakl.

⁶ Ti tun titunwanbir ke tiyaajatiib aah tun pu na la; ti kpa mbiin le ki ye titunwanbirdam.

⁷ Tiyaajatiib aah nan bi Ijipt aatiŋ ni na, baa nan bee Uwumbɔr aatukpaan aatataa; bi nan suln waah mɔk bi waageehm kaa ti ki nyi mumɔk pu na, le ki yii waamɔb Limɔɔkal Aanyusakpem na chee.

⁸ Tɔ, waah nan puu pu na, u nan gaa bi lii, ke ni mɔk waah kpa mpɔɔn sakpiin mu na.

⁹ U nan di umɔb le tuk Limɔɔkal Aanyusakpem ngbaan, le mu foor, le u cha waanib chuun kitikuun pu ki puur.

¹⁰ U nan gaa bi binib bi kaa gee bi na chee lii; u nan gaa bi baadim chee lii.

¹¹ Tɔ, baadim ma nan tee bee nnyun ni; ubaa kina aa nan gur.

¹² Le waanib nan tii waah puu tipuur ti na naadii, ki gaa ilahn ki pak u.

¹³ Tɔ, naa yunn le bi kpaan suln waah tun pu na, le kaa sɔŋ bisui ke u sur bi, le ki ŋani baageehn.

¹⁴ Le nteersakpiin ngbaan ni, kikpeek cha bi tɔŋ Uwumbɔr;

¹⁵ le u tii bi baah ban pu na, ki mu ki cha iween sakpiin ibaa lir bi pu.

¹⁶ Nteersakpiin ngbaan ni le bi nan kpa lipiipoln Moses ni Aaronn u Uwumbɔr nan lee u na pu,

¹⁷ le kitiŋ chuu piir ki di Datann nab, ki biin Abiram ni waadichal pu;

¹⁸ le mmii ker lir ni baadidiliib pu le ki wun ku bibiindam ngbaan.

¹⁹ Sainai aajoo chee le bi nan di salmaa naan unaajabo le ki dooni liwaal ngbaan;

²⁰ bi nan di Uwumbɔr aapak tii kiwakork ki ŋmɔ timoor na aanaŋ.

²¹ Bi suln Uwumbɔr u nan di waapɔɔn sakpiin tun ŋitun Ijipt aatiŋ ni ki gaa bi lii na aabɔr.

²² Bi suln waajinjiir aatun ŋi u nan tun nima chee na bɔr, ni iwaan aatun ŋi u nan tun Limɔɔkal Aanyusakpem chee na aabɔr.

²³ Uwumbɔr aah nan bui ke u ga kuln waanib na, waatutunn Moses, u u nan lee u na aa nan kii kina; u nan kiir Uwumbɔr, le waaŋuul aa kuln bi.

²⁴ Le bi nan yii mmɔɔn aatiŋ; ba pu? baa nan pak ke Uwumbɔr ga ŋa waah puu tipuur ti na.

²⁵ Bi nan gaar baakakar ponn ni le ki ŋulni, kaa pel Uwumbɔr aah len pu na.

²⁶ Kina pu le u nan sak bi mbamɔm ke u ga cha bi kpoi nteersakpiin ngbaan ni,

²⁷ ki cha biyaabitiib yaa koo binib bi kaa nyi u na ponn ni, ki cha bi kpoi biwɔwɔm aatim ni.

²⁸ Peor aatiŋ ni, le Uwumbɔr aanib ti kpee binib bi dooni liwaal Baal na pu, le ki jin baah di tiwan ni toor tii ŋiwaa ŋi po ye unibɔn aawanaankaan na.

²⁹ Baatun le nan fiin Uwumbɔr aaŋuul, le iween i bir sakpen na lir ni bikaasisik ni.

³⁰ Tɔ, Fineas nan fii sil ki daa binib bi aabɔr aa ŋan na aatafal, le iween ngbaan doo.

³¹ Ki nyan n‑yoonn ngbaan ki joo cha, bi nan teer nimina ki pak Fineas, le bi ga li beenin teer, ki ti saa n‑yoonn mu choo na.

³² Meriba aanyunbun chee le binib ngbaan nan ki cha Uwumbɔr aaŋuul fii. Bi pu, Moses nan koo tibɔr ni.

³³ Bi nan gbir uponn ni sakpen, le u len tibɔr kaa teer ke u sil ki dakl lik waahr.

³⁴ Uwumbɔr aah nan bui ke bi ku binib bi kaa nyi u na, baa nan ŋa kina,

³⁵ bi tee labr, le bi ni bima yoor tɔb aabim, le ki gaa binib ngbaan aabimbin,

³⁶ le ki dooni ŋiwaa, le nimina kuln bi.

³⁷ Bi nan di bijapɔtiib ni bibisatiib toor kitork tii kinimbɔŋ.

³⁸ Binikurb ngbaan aah nan ku mbim mu kaa tun taani ubaa na, le ni bii kitiŋ ngbaan.

³⁹ Baatun nan cha bi ŋa bibaa tijɔŋdam, le kaa ki si Uwumbɔr aapuwɔb.

⁴⁰ Le Uwumbɔr aaŋuul nan fii bima waanib pu; bi nan gur sukr uponn ni la.

⁴¹ Le u siir cha bi, ki di bi ŋa binib bi kaa nyi u na aapɔɔn ni, le baadim gur joo bi.

⁴² Baadim nan muk bi, le bi kpaln baanaagbiib.

⁴³ N‑yoonn mɔmɔk kan, Uwumbɔr nan gaal waanib lir la, le bi yii, ki ki nyan upuwɔb ki moo koo titunwanbir ni.

⁴⁴ Tɔ, bi mu yaa tee wii ki yin u kan, le u pel baayim ngbaan, ki bee ke bisui bii.

⁴⁵ Bima pu le u teer waah nan puu tipuur ti na, le waageehm sakpem pu, u sɔŋ usui.

⁴⁶ U nan cha binib bimɔk muk bi na san bi kinimbaak.

⁴⁷ Tidindaan Uwumbɔr, gaa timi lii, ki nyan ni timi ŋitimbol ngbaan ni ki giin ni, aan ti ga li kpa idoon ki pak saayimbil li bi chain na.

⁴⁸ Pak Uwumbɔr u ye Israel yaab Aadindaan na man; li pak u dandana, ni n‑yoonn mu kaa kpa ndoon na. Cha unii mɔmɔk len ke, “Amii”. Pak Uwumbɔr man.