Ilahn 105 - Uwumbɔr aagbaŋ

Uwumbɔr ni waanib

¹ Di idoon tii Uwumbɔr man, moon waah kpa mpɔɔn pu na man; bui ŋitimbol waah tun ŋitun ŋi na man.

² Gaa ilahn ki pak Uwumbɔr man; ki tuk binib waah tun ŋitukpaan ŋi na.

³ Taah ye waanib pu na, cha tisui li piin man; Cha binib bimɔk dooni u na li kpa mpopiin.

⁴ Li cha Uwumbɔr chee ti ban nterm man; ki li dooni u n‑yoonn mɔmɔk.

^5-6 Nimi waatutunn Abraham aayaabitiib, nimi bi ye Jakob aayaabitiib bi u nyan bi na, teer Uwumbɔr aah tun lijinjiir aatun ŋi na, ni waah nan jin binib tibɔr pu na man.

⁷ Uwumbɔr le ye Tidindaan, waakaal ye dulnyaa wee mɔmɔk aakaal la.

⁸ U ga li joo waah puu tipuur ti na ki ti saa n‑yoonn mu kaa kpa ndoon na.

⁹ U ga li joo tipuur ti u nan puu tii Abraham ni Aisak na.

¹⁰ Uwumbɔr puu tipuur ti kaa kpa ndoon na tii Jakob.

¹¹ U bui ke, “M ga di Kanaann aatiŋ tii si, ki ga li ye saatiŋ la.”

¹² Uwumbɔr aanib aa nan wiir, le ki ye biwɔwɔm Kanaann aatiŋ ni.

¹³ Bi nan chuun yiini ki ti nya kitiŋ kee ni, ki ti saa kitiŋ kee ni, ki nya nnaan mue ni, ki ti saa mue ni.

¹⁴ Uwumbɔr aa nan cha ubaa muk bi; waah nan ban u li kii bi pu na, le u nan sak bibɔrb ke,

¹⁵ “Taa tii maatutum titotonn man; taa meeh maabɔnabtiib man.”

¹⁶ Uwumbɔr nan tun ni nkon baatiŋ pu, ki chuu gaa baajikaar mɔmɔk.

¹⁷ Tɔ, u nan tee tun uja ubaa ke u loln bi pu nsan, uma le ye Josef, u bi nan kooh ŋa tinaagbiir ni na.

¹⁸ Bi nan di tikululn gbin utaa, ki di tikur aabuen leen usil

¹⁹ ki ti saa n‑yoonn mu u nan puu ke tiwan ni ga ŋa na gbiin kina. Uwumbɔr aamɔboln nan mɔk ke u sil ye ubamɔndaan.

²⁰ Le Ijipt aabɔr cha u kan ubaa; ŋitimbol aajojoor ngbaan gaa u lii.

²¹ U nan di tininkpir tii u ki cha u ye kitiŋ ngbaan kookoo aabɔr,

²² ki kpa mpɔɔn ki lik ubɔr aaninkpiib, ki kpa mpɔɔn ke u bui ubɔr aasusurb baah ga ŋa pu na.

²³ Le Jakob nan buen Ijipt ki ti kal nima.

²⁴ Uwumbɔr nan cha waanib pɔr pam, ki cha bi kpa mpɔɔn jer baadim.

²⁵ U nan cha Ijipt yaab nann waanib ki ŋmanni bi.

²⁶ Le u nan tun waatutunn Moses, ni Aaronn, u u nan lee u na.

²⁷ Uwumbɔr nan cha bi tun waatukpaan ki tun iwaan aatun Ijipt aatiŋ ni.

²⁸ Baa nan yii waamɔb. Uwumbɔr nan cha mbɔmbɔɔn biin kitiŋ ngbaan pu,

²⁹ U nan cha baamɔɔ aanyun kpaln nsin ki ku baajan mɔmɔk.

³⁰ Ŋipulaatal nan gaa baatiŋ, hali ki ti kpaan gbiin libɔrchiln ni mu.

³¹ Uwumbɔr nan di umɔb len, le tisibir ni tinaapulor gbiin kitiŋ ngbaan mɔmɔk ni.

³² U nan cha ŋitaanal lir, ki cha utaal moor kitiŋ ngbaan ni, kaa cha utaal nun.

³³ U nan bii baadaan aasubil ni ŋisubil ŋiken aasui, ki kool isui mɔmɔk lir.

³⁴ U nan di waamɔb le len, le itoon churbakaa u kaa kpa nkahm na dan.

³⁵ I nan di timoor ni tisufar ti mɔmɔk bi kitiŋ ngbaan pu na ŋman; i nan ŋman baajikaar mɔmɔk pel pel.

³⁶ U nan ku Ijipt aadichadaan mɔmɔk aajan aabijabim,

³⁷ le ki nin cheen Israel yaab nyan kitiŋ ngbaan ponn ni. Bi nan tu tikunabr ni salmaa mam, le bi mɔmɔk kpa laafee ki pɔɔ.

³⁸ Ijipt yaab nan san bi ijawaan la; le baah nan nyan baatiŋ ni na, Ijipt yaab aasui nan piir.

³⁹ Uwumbɔr nan di ntaalangbam le biin waanib pu, ki tii bi mmii kinyeek ke mu tii bi nwiihn.

⁴⁰ Bi nan mee Uwumbɔr le u cha ichakpee dan; u nan cha tijikaar nyan ni paacham ke bi nan ji ki bab.

⁴¹ U nan chuu piir litakpal, le nnyun chee nyan ni, ki puu nteersakpiin ni ke limɔɔl na.

⁴² U nan teer waah nan puu tipuukpaan ti tii waatutunn Abraham na.

⁴³ Kina le u nan cheen waanib bi u gann bi na nyan, le bi nan gaa ilahn ki tar mpopiin pu.

⁴⁴ U nan di binib biken aatim tii bi, ki cha bi gaa baakpaakon,

⁴⁵ aan ni cha bi kii waamɔb ki li joo waakaal. Pak Uwumbɔr man.