Ilahn 104 - Uwumbɔr aagbaŋ

Uwumbɔr u nan naani tiwan mɔmɔk na aapak

¹ M joo nsui mɔmɔk pak Uwumbɔr la. Ndindaan Uwumbɔr, saapɔɔn nyaŋ sakpen a. Aa kpa nnaan aapɔɔn ni nnyuŋ;

² aa ye nwiihn ŋmeen la. Aa taln paacham ke likekeln na la,

³ le ki maa saadichal nnyun mu bi paab na aapaacham. Aa di ntaalangbam le ŋa saataan aatɔroku, le ki dik libuln aafeen pu.

⁴ Libuln le ye saatuuntiib, le imiigaal ye saatutum.

⁵ Aa di kitiŋ nyal siin kaabuul ni, le kaan ki foor daalbaadaal.

⁶ Aa di nnyusakpem paan ki pu ke likekeln na, le nnyun biin ŋijoo pu.

⁷ Saah kae nnyun na, le mu san buen; mu aah ŋun saah teen ki len pu na le mu chii ki san buen.

⁸ Mu puu labr ŋijoo pu le ki sunni tifatann ni, ki buen saah toor nin chee tii mu na.

⁹ Aa siin mu aanaanmɔk, nin chee mu aan ki ŋmaa jer na, ke mu taa ki ŋmaa biin kitiŋ pu.

¹⁰ Aa cha uyayak aanyunbun puu tifatann ni, le ŋimɔɔ puu ŋigongon aakaasisik ni.

¹¹ Muma le tii ipeel nnyun aan i nyu; nima chee le timoor ni aabon aanyunyuu door.

¹² Isui i si gbɔk nima chee na ponn ni le inyoon ter yaanyandil ki gaa ilahn.

¹³ Aa cha utaal nya kitaapaak ki lir ni ŋigongon pu, le ki cha kitiŋ kani saanyoor.

¹⁴ Aa cha timoor muuni, le tiwakor kani ki ŋmɔ, ki tii unibɔn njikaabim, muma le u joo ko kisaak ki kani tijikaar,

¹⁵ ki cha u kani ndaan mu piir usui na, ki tii u olif aasui aakpan mu cha unimbil wɔb ŋan na, ni tijikaar ti ga tii u mpɔɔn na.

¹⁶ Lebanonn aasantina aasui kani utaal, ima le ye Uwumbɔr ubaa aasui i u bun na.

¹⁷ Nima chee inyoon ter yaanyandil; le inaakpaapiin mam kpiini yaabim isui i fɔk na ponn ni.

¹⁸ Ipɔɔŋoob bi ŋijoo ŋi paa na pu la, le ŋijoo paab aalapol bɔrni ŋijootakpal ni.

¹⁹ Aa naan uŋmal ke u li mɔk iŋmal aawiin; nwiin nyi buyoonn mu ga lir na.

²⁰ Sin le naan kinyeek, le ipeel mɔmɔk nya ni mbɔmbɔɔn ni.

²¹ Ichinn yaa chuun ban tinann kan, i ŋuuni, le ki ban tijikaar ti Uwumbɔr tii i na.

²² Nwiin yaa ti puu kan, le i gir ti doon yaabuu ni,

²³ le binib nya ki buen baatuln ni, ki ti bi tun, ki ti saa kijook.

²⁴ Uwumbɔr, aa naan tiwan sakpen a. Aa di nlansakpem le naan ni mɔmɔk, saawanfuurkaan le gbii kitiŋ pu.

²⁵ Nnyusakpem bi, le ki waa sakpen; mu ponn ni le tiwanfuurkaan ni wiir sakpen na bi, ni filk na, ni niwaatiir mɔmɔk bi.

²⁶ Iŋɔsakpiin chuun mu pu, le nnyun ni aapeesakpiin na gbiir mu ponn ni. Sin le naan nnyun ni aapeesakpiin ngbaan.

²⁷ Ni mɔmɔk lik sin pu le ke aa tii ni tijikaar buyoonn ni ban ti na.

²⁸ Aa tii ni, le ni ji ti, aa tii ni tijikaar, le ni ji babr.

²⁹ Aa yaa fenn siir kan, le ijawaan chuu ni; aa yaa chuu naafuurk kan, le ni kpo, ki gir kpaln titan ti ponn ni ni nyan ni na.

³⁰ Tɔ, aa yaa tii ni kifuurk kan, le ni kpaln tiwan ni aa naan na; sin le tii kitiŋ aawan limɔfapɔln.

³¹ Uwumbɔr aapak ga yunn ki ti saa n‑yoonn mu kaa kpa ndoon na. Uwumbɔr aasui ga li piin waah naan tiwan ni na pu.

³² U yaa lik kitiŋ pu kan, ki jii la; u yaa meeh ŋijoo kan, le iŋmanyuu nya ni.

³³ Maamɔfal mɔmɔk aayoonn ni, m ga li gaa ilahn tii Uwumbɔr; m ga li gaa ilahn ki pak Maawumbɔr n‑yoonn mumɔk m bi limɔfal ponn ni na.

³⁴ Usui li piin maalahn pu, ba pu? maapopiin mɔmɔk nya ni uma chee la.

³⁵ U kuln titunwanbirdam mɔmɔk kitiŋ kee pu; bibiindam taa ki li bi kpala. M joo nsui mɔmɔk pak Uwumbɔr la. Pak Uwumbɔr man.