Ilahn 103 - Uwumbɔr aagbaŋ

Uwumbɔr aageehm

¹ M joo nsui mɔmɔk pak Uwumbɔr la. M joo nwon mɔmɔk pak waayimbil li bi chain na la.

² M joo nsui mɔmɔk pak Uwumbɔr la, kaan suln waah ŋa mi tiŋann pu na.

³ U cha pinn mi maatunwanbir, le ki sɔŋni maaween mɔmɔk.

⁴ U nyani mi nkun ni, le ki joo ngeehm ni linimbaasaln aanyoor ŋani mi.

⁵ U tii mi tiwanyaan ŋmeen la, le m bi, ki pɔɔ, ki kpa mpɔɔn ke likaagiil na.

⁶ Uwumbɔr nyi baah muk binib bi na bɔr le ki ter bi ki tii bi baabamɔn.

⁷ U nan di waah ban u tun pu na kpiir mɔk Moses, le ki cha Israel aanib kan waapɔɔn aatun.

⁸ Uwumbɔr ye unimbaasaln la, le ki gee timi, waaŋuul aa fiir woween, le u gee timi sakpen.

⁹ Waa galni binib ki ti cha dik dik, waaŋuul sɔŋni mala mala la.

¹⁰ Waa dar timi aatafal ki ŋeer taah tun pu na, kaa teeni timi, timi aatunwanbir ni timi aataani pu.

¹¹ Kitiŋ ni kitaapaak aah daa tɔb chee pu na, kina le waageehm wiir binib bi san u na chee.

¹² Liwipuul ni liwilir aah daa tɔb chee pu na, kina le u nyan timi aatunwanbir ti chee ki di buen dandar.

¹³ Ubo aate aah gee u sakpen pu na, kina le Uwumbɔr gee binib bi san u na.

¹⁴ U nyi taah nyan ni tiwan ni ponn ni na; u teer ke ti ye titan la.

¹⁵ Tima kan, timi aamɔfal bi ke timoor na la. Ti muuni woween ki ŋan ke nsupuun na la;

¹⁶ libuln le daar mu pu, le ki di mu buen; le ubaa aan ki kan mu.

¹⁷ Uwumbɔr aageehm aa door binib bi san u na ma chee,

¹⁸ le waaŋann aa kpa ndoon binib bi tii waah puu tipuur ti na naadii ki joo waakaal mbamɔm na chee.

¹⁹ Uwumbɔr di waabɔrjal siin paacham; uma le ye unibɔn ni tiwan mɔmɔk aabɔr.

²⁰ Nimi Uwumbɔr aatuuntiib bi pɔɔ sakpen ki kii waah len pu na, ki pel waah len pu na, pak uma Uwumbɔr man.

²¹ Paacham yaab bi kpa mpɔɔn na mɔmɔk, ni nimi waatutum bi ŋani waageehn na, pak Uwumbɔr man.

²² Tiwanfuurkaan ni mɔmɔk bi waah joo nin chee mɔmɔk na, pak Uwumbɔr man. M joo nsui mɔmɔk pak Uwumbɔr la.