Ilahn 102 - Uwumbɔr aagbaŋ

Naah muk unachipɔɔn u na aameel

¹ Uwumbɔr, li pel maameel ki ŋun maah wii ki ban nterm pu na.

² M yaa bi tibɔr ni kan, taa fenn aapuwɔb tii mi, li pel m chee, ki kii mi mala buyoonn m yin si na.

³ Maamɔfal bi wɔŋni ke iŋmanyuu na la; nwon bi wu ke mmii na la.

⁴ Bi gbaa mi bil ke timokuun na la; maa ki neen tijikaar tibaa.

⁵ M ker idun mpɔɔn pu la; m gur ye ngban ni ikpab ŋmeen la.

⁶ M gur naahn timoor ni aanyoon u bi nteersakpiin ni na la, ki naahn ufiin u bi tilangbenn ni na.

⁷ M dɔ waa kinyeek la; m naahn unyoon u ka kidiipaab ubaa baanja na la.

⁸ Maadim seei mi le nwiin ti lir; binib bi ŋani mi mbɔnyun na joo maayimbil puuni lir biken pu la.

^9-10 Saaŋuul li pɔɔ sakpen na pu, nfatan le gur ye maajikaar, le maanyunyunn ŋmalni maanyunyukoo ni. Aa bɔ yoor mi le ki di mee.

¹¹ Maamɔfal gur naahn kijook aajunjuŋ la; m gur bi ke timokuun na la.

¹² Uwumbɔr, le sin ma ye ubɔr n‑yoonn mɔmɔk; n‑yoonn mɔmɔk aanib ga teer aabɔr.

¹³ Aa ga fii sil ki san Sionn kinimbaak; n‑yoonn fuu ni ke aa san ki kinimbaak; n‑yoonn mu ŋan na sɔ.

¹⁴ Kaah ber ki kuln pu na, saatutum beenin gee ki la; kaah gur tilangbenn pu na, bi san ki kinimbaak la.

¹⁵ Ŋitimbol ga li san Uwumbɔr ijawaan la; kitiŋ kee aabɔrb mɔmɔk ga li san waapɔɔn ijawaan la.

¹⁶ Uwumbɔr yaa ki gir maa Sionn kan, u ga nyan waapɔɔn sakpiin mpaan pu.

¹⁷ U ga ŋun waah yii waanib bi na pu ki pel baameel.

¹⁸ Ŋmee bil Uwumbɔr aah tun pu na, aan n‑yoonn mu choo na yaab nan kan, aan baah kaa kee ma binib bi na nan pak u.

¹⁹ Uwumbɔr bi waabuul li bi paacham ki bi chain na, le ki lik ni taab, u bi paacham le ki lik ni kitiŋ taab do,

²⁰ u ŋun binib bi bi tiyondir ni na aah ker idun pu na, ki gaa baah siin ke bi ku binib bi na lir.

²¹ Kina pu le bi ga moon waayimbil Sionn ni, le bi pak u Jerusalem ni,

²² n‑yoonn mu ŋitimbol ni nnaan mɔmɔk dan ke bi nan kpaan ki doon u na.

²³ M laa ye unachipɔɔn la, le Uwumbɔr cha maa ki kpa mpɔɔn, u gii maamɔfal pu.

²⁴ Uwumbɔr, taa yoor mi buen dandana; cha m por waahr. Uwumbɔr, aa bi n‑yoonn mɔmɔk la;

²⁵ n‑yoonn mu jer na le aa nan naan kitiŋ, ki di aabaa aaŋaal naan paacham.

²⁶ Kitiŋ ni paacham ga doo, le aa ma ga li beenin bi; ni mɔmɔk ga kpoi ke ŋibɔkul na, aa ga di ni mae ke kikekekpiik na, ni mɔmɔk ga wɔŋ.

²⁷ Le sin ma beenin bi, kaan kpeln, saayoonn aan doo.

²⁸ Timi aabilb ga li bi lifuur ni, le aa ga li kii bi, le biyaabitiib ga nan kan ŋŋmarm.