Ilahn 101 - Uwumbɔr aagbaŋ

Ubɔr aah puu tipuur ti na

¹ Uwumbɔr, maalahn ye ibamɔn ni ngeehm aalahn la, le m gaa mu tii si.

² Maatuln aan li kpa tijɔŋ. Bayoonn aan aa ga dan m chee? M ga li joo mbimbin mu ŋan na le bi maadichal ponn ni,

³ kaan kii tii titunwanbir kpala. M nan binib bi fenn bipuwɔb tii Uwumbɔr na; m ni bima aan kpaan ki tun lituln.

⁴ Maan tun beebee aatuln, kaan tun titunwanbirdam chee lituln.

⁵ M ga jenn nyan unii umɔk looni len titunwanbir uŋeen aatɔ pu na; maan kii tii unii u kpa kigaak ni inimpoo na.

⁶ M ga kii tii binib bi kii tii Uwumbɔr na ki cha bi li koo maabɔrchiln ni. Binib bi kaa kpa taani na ga li kpa nsan ki tun maatuln.

⁷ Unyamɔndaan ubaa aan kan nkookoo yaan maabɔrchiln ni; uŋmaŋmannii ubaa aan sil nnimbiin ni.

⁸ Iwiin mɔmɔk kan, m ga li ku bibiindam bi bi timi aatiŋ pu na la; m ga jenn nyan titunwanbirdam mɔmɔk Uwumbɔr aatiŋ ponn ni.