Ilahn 10 - Uwumbɔr aagbaŋ

Limeel li ban ibamɔn na

¹ Uwumbɔr, ba ŋa aa daa ti chee kina? Ba ŋa aa joo aabaa bɔrni buyoonn ti bi tibɔr ni na?

² Bibiindam kpa kigaak, le ki muk bigiim, cha bima bibaa aah pen gaawɔb mam bi na chur bi.

³ Ubiindaan kpa kigaak waanimbɔŋ aageehn aatuln pu la, le ukumɔndaan seei Uwumbɔr ki yii u.

⁴ Ubiindaan aatafal aa bi Uwumbɔr ni; waagaak ponn ni le u dak ke Uwumbɔr aa bi tibɔr tibaa ni.

⁵ Ubiindaan kani tinyoor waatuln mɔmɔk ni la. Waa beer Uwumbɔr aabɔjil aatataa; u lik seeni waadim la.

⁶ U bui ubaa le ke, “Maan lir kpala; maan koo tibɔr ni daalbaadaal.”

⁷ Waamɔliin ye tipuun, ni inyamɔn, ni tifaan ŋmeen la, le ki len titunwanbir, ni kinanaŋ aabɔr mala mala.

⁸ U joo ubaa bɔrni itingbaan ni la, ki kii ke u keln maa‑kpa‑taani‑dam ki ku bi. U pekr lik binib bi kaa kpa uteter na,

⁹ ki di ubaa bɔr ke uchinn na. U dɔ kii bigiim, le ki pen gaawɔb chur bi, ki dar bi buen.

¹⁰ Bi joo mpɔɔn mu kaa ŋan na nyaŋni binib bi kaa kpa biteterb na, ki taa taa ku bi.

¹¹ Ubiindaan bui ubaa le ke, “Uwumbɔr aatafal aa bi maah ŋani pu na ni, u ŋumni unimbil la, kaan kan mi daalbaadaal.”

¹² Uwumbɔr, daa bibiindam ngbaan aatafal, teer binib bi ji falaa na bɔr.

¹³ Ubiindaan lik seen Uwumbɔr, le ki bui ubaa ke, “Waan daa ntafal.”

¹⁴ Le aa kani, aa chur falaa ni tibɔbir mɔmɔk bilni, le ki gor n‑yoonn mɔmɔk ke aa ter binib. Unii u kaa kpa uteter na di ubaa tii si la, aa ter binib bi lann na n‑yoonn mɔmɔk.

¹⁵ Bii bibiindam ni kinimbɔŋdam aapɔɔn. Daa bitafal baah ŋani taani u na pu, ki ti saa buyoonn bi ga di cha na.

¹⁶ Uwumbɔr le ye ubɔr n‑yoonn mɔmɔk. Binib bi dooni ŋiwaa na ga kuln waatiŋ pu.

¹⁷ Uwumbɔr, aa ga ŋun binib bi sunn bibaa taab na aameel, aa ga pɔɔk bitaakpab.

¹⁸ Aa ga ŋun bimukdam ni nkpobim aawiil, aa ga len tibɔr kpee bi pu, aan unibɔn u ye tiwan ni ga kpo na taa ki faan ubaa.