Ikaal 9 - Uwumbɔr aagbaŋ

Israel yaab aatafalaaŋun aabimbin

¹ “Israel yaab, li pel man. Din wee na, ni ban ni puur Jɔɔdann Aamɔɔl aan ki gaa ŋinibol ŋi wiir ki kpa mpɔɔn jer nimi na aatiŋ la. Baatim ye mukpaan la, le bi maa ŋigon ŋi fɔk ti nyan paacham na gob mu.

² Binib ngbaan fɔk ki kpa mpɔɔn. Bi ye ŋiniwɔk la, le ni ŋun ke ubaa aan ŋmaa faa bi butɔb.

³ Ni ga kan, ki bee nibaa, ke Nidindaan Uwumbɔr ga loln ni pu nsan, ke mmii mu pɔɔ na. Naah tur koo bi ni pu na, le u ga nyaŋ bi, aan ni jenn nyan bi woween, ki kuln bi, ke waah nan puu pu na.

⁴ “Nidindaan Uwumbɔr yaa jenn bi tii nimi kan, ni taa dak nee aapuwɔb, ke naah ŋan sakpen pu na le cha u gaa baatiŋ ngbaan tii nimi. Naa ye kina, ni ye ke binib ngbaan aah kpa mbiin pu na le u ban u jenn nyan bi.

⁵ Naa ye ke ni ye bininyaam ki ŋani tiwan ni ŋan na nima le cha u ban ni gaa baatiŋ. U ga jenn nyan bi, ba pu? bi ye mbiindam la, le u ki ban u gbiin tipuur ti u nan puu tii niyaajatiib Abraham, ni Aisak, ni Jakob na.

⁶ Ni li nyi mbamɔm ke naa ye ke ni ŋan ki ŋeer kitiŋ ngbaan le ga cha u gaa kitinyanyaan ngbaan tii nimi. Naa ye kina, ni ye tafalaaŋun aanib la.

⁷ “Ni teer, ki taa suln naah nan bi nteersakpiin ni, ki ŋa Nidindaan Uwumbɔr liŋuul pu na. Nwiin mundaal ni nyan ni Ijipt aatiŋ ni, ki nan saa bundaal ni fuu ni do na, ni yii waamɔb.

⁸ Sainai Aajool chee, ni nan ŋa Uwumbɔr liŋuul. Naah nan ŋa u liŋuul pu na nan ŋeer u kuln nimi.

⁹ M nan jon Sainai Aajool paab, m ti gaa ŋitakpapapan ŋi pu Uwumbɔr nan ŋmee waakaal i u nan di tii nimi na. M nan bi nima iwiin ni tinyer imonko ilee, le kaa nan jin, ki mu aa nyun nibaa.

¹⁰ Le Uwumbɔr nan di ŋitakpapapan ŋilee ŋi pu u nan di ubaa aaŋaal ŋmee waah nan len ni chee tibɔr, mmii ni, bundaal ni nan kuun si lijool ngbaan chee na, tii mi.

¹¹ Mbamɔn, iwiin ni tinyer imonko ilee ngbaan aah jer na, le Uwumbɔr di ŋitakpapapan ŋilee ŋi u nan ŋmee waakaal ŋi pu na tii mi.

¹² “Le Uwumbɔr bui mi ke, ‘Ŋa mala ki sunn lijool taab; saanib bi aa nyan ni bi Ijipt aatiŋ ni na yii mi, ki tun titunwanbir. Bi kpaan fenn ki cha maah tuk bi ke bi ŋa pu na, le ki ŋa liwaal tii bibaa.’

¹³ “Uwumbɔr nan ki bui mi ke, ‘M nyi binib ngbaan aah kpa tafalaaŋun pu na.

¹⁴ Aa taa kiir mi. M ban ke m kuln bi, nima kan, ubaa aan ki teer bibɔr, le ki ga cha saamaal ŋa litimbol sakpeln li ga li pɔɔ ki jer bi na.’

¹⁵ “Nima pu na, m nan ŋa mala, le ki sunn ni lijool ngbaan taab, ki joo ŋitakpapapan ŋilee ŋi Uwumbɔr nan ŋmee waakaal ŋa ŋi pu na. Mmiigaal nan nyan ni lijool ngbaan paab.

¹⁶ M nan kan ke ni kpaan yii Nidindaan Uwumbɔr aakaal i u di tii nimi na a, le ki tun titunwanbir u chee, ba pu? ni ŋa liwaal li bi ke unaajabo na tii nibaa, ki dooni li.

¹⁷ Nima pu na, m nan di ŋitakpapapan ngbaan mee lii ninimbiin ni, le ŋi wii yak yak.

¹⁸ Le m ki lir gbaan Uwumbɔr aanimbiin ni, nwiin pu ni kinyeek, iwiin imonko ilee, kaa ji, kaa nyu nibaa. Naah nan tun titunwanbir Uwumbɔr chee, ki cha waaŋuul fii pu na le cha m nan ŋa kina.

¹⁹ Uwumbɔr aah nan gee liŋuul sakpen pu na, le ijawaan nan chuu mi. Usui nan fii sakpen, le u ban ke u kuln nimi; le maah nan ŋa pu na, Uwumbɔr nan ki sɔŋ usui ki ŋun tii mi.

²⁰ Uwumbɔr aaŋuul nan fii Aaronn pu, le u ban u ku u, nima pu na, m nan mee Uwumbɔr tii Aaronn mu n‑yoonn ngbaan.

²¹ Naah nan ŋa titunwanbir aawan ni nan ye tikur aanaajabo na, m nan nyan ni ki di see mmii. M nan gbaa wii ni yak yak, ki nan ni le ni ti ŋa n‑yon, le m di mu mee ŋa mbun mu nyan ni lijool aapaacham ki choo taab na.

²² “Ni nan ki ŋa Nidindaan Uwumbɔr liŋuul, buyoonn ni nan bi Tabera, ni Masa, ni Kiberof Hatafa aatim ni na.

²³ Buyoonn ni nan bi Kades Banea na, u nan bui nimi ke ni buen ti gaa kitiŋ ki u nan puu ke u ga di tii nimi na, le ni yii waamɔb, kaa tii u naadii, kaa kii waamɔb.

²⁴ Maah bee nimi bundaal ki nan saa din wee na, naa kii tii Uwumbɔr.

²⁵ “Maah bee ke Uwumbɔr ban u kuln nimi na, le m gbaan unimbiin ni, nwiin pu ni kinyeek, ki ti saa iwiin imonko ilee.

²⁶ M nan mee ke, ‘Ndindaan Uwumbɔr, taa kuln saanib bi aa di saapɔɔnsakpiin gaa bi lii, ki nyan ni bi Ijipt aatiŋ ni na.

²⁷ Teer ki taa suln saatutum Abraham, ni Aisak, ni Jakob bɔr, ki taa gar binib ngbaan aatafalaaŋun aabimbin, ni baah kpa mbiin ki tun titunwanbir pu na.

²⁸ Ni yaa kaa ye kina kan, Ijipt yaab ga bui ke saa ŋmaa joo binib ngbaan fuu kitiŋ ki aa nan puu ke aa ga di tii bi na ni la. Bi ga bui ke saa nan gee saanib ngbaan, le ki di bi dan nteersakpiin ni, ke aa nan kuln bi.

²⁹ Ni ye mbamɔn ke binib bee le aa nyan bi ke bi li ye saanib, le ki di saapɔɔn sakpiin na nyan ni bi Ijipt aatiŋ ni.’