Ikaal 8 - Uwumbɔr aagbaŋ

Kitinyaan ki Uwumbɔr ban u di tii waanib na

¹ “Ni li keei tii ikaal imɔk m di mɔk nimi din aataak kee na mbamɔm, nima kan, ni ga li kpa limɔfal, ki maa mbim, ki pɔr sakpen, aan nima kan, ni ga ŋmaa gaa kitiŋ ki Uwumbɔr puu ke u ga di tii niyaajatiib na.

² Ni teer ŋibin imonko ilee ŋi jer na ponn ni, Nidindaan Uwumbɔr aah nan loln ni pu nsan dandar mumina, nteersakpiin ni pu na. U nan di ŋimuk aabɔŋ tɔŋ nimi, ke u lik naah ga ŋa pu na, ki ki lik ke ni ga joo waakaal aan naan joo i.

³ U nan cha ni chuun nkon, le u di tijikaar ti bi yin ti ke mana, aan nimi ni niyaajatiib aa nyi ti na kpiin nimi. U nan ŋa kina ke u mɔk nimi ke naa ye tijikaar baanja le ga ŋmaa tii unii limɔfal; limɔboln limɔk nyan ni Uwumbɔr aamɔb ni na le ga tii unii limɔfal.

⁴ Naah chuun ŋibin imonko ilee ŋimina ponn ni na, nimi aawanpeenkaan aa kpo, le nimi aataa mu aa duun.

⁵ Ni teer ke Nidindaan Uwumbɔr nan sur nimi ki daa nitafal, ke ubo aate aah sur u pu na.

⁶ Nima pu na, ni ŋa Uwumbɔr aah tuk nimi pu na, ni li dii waakaal aah mɔk nimi pu na, ki kii waamɔb.

⁷ Nidindaan Uwumbɔr le joo nimi cha kitiŋ ki nyuun na ponn ni, kitiŋ ki kpa ŋimɔɔ, ni inyunbun, ni nnyun mu nyeeni nya kitiŋ ki puu cha tifatann, ni ŋigongon ni na,

⁸ kitiŋ ki ŋani njikaabim, ni ŋisubil aabɔŋ aabɔŋ, ni olif aakpan aasubil, ni tisiir na.

⁹ Kitiŋ ngbaan ni, nkon aan chuu nimi, le ni mu aan lann nibaa. Kaatakpasakpiin kpa tikur ŋi ponn ni, le ni ga ŋmaa kan kaagongon ni tikumann.

¹⁰ Ni ga kan tijikaar mɔk aabɔŋ kitiŋ ngbaan ni ki ji bab; le ni ga doon Nidindaan Uwumbɔr kitinyaan ki u di tii nimi na pu.

Bi taa suln Uwumbɔr bɔr

¹¹ “Ni li nyi ki taa suln Nidindaan Uwumbɔr bɔr, ni taa yii waakaal imɔk m di tuk nimi din wee na.

¹² N‑yoonn mu ni ti kan ki jin bab, ki maa ŋidichanyaan ki koo ŋi ni,

¹³ aan nimi aawakor moo pɔr kpee, aan ki kan tikunabr, ni salmaa, aan nimi aawan mɔmɔk moo kpee kan,

¹⁴ ni li nyi ki taa li kpa kigaak, aan ki suln Nidindaan Uwumbɔr u nan nyan ni nimi Ijipt aatiŋ ni, nin chee ni nan ye binaagbiib na bɔr.

¹⁵ Uma le nan loln ni pu nsan, nteersakpiin mu bir na ni, nin chee inyoohn ni ikuub i kpa liluul sakpen na bi na. Kitikuun ki kaa kpa nnyun kpala na, le u nan cha nnyun nyan ni litakpajool ponn ni, le ni nyun.

¹⁶ Nteersakpiin ngbaan ni, le u nan tii nimi tijikaar ti bi yin ti ke mana na, le ni jin, tijikaar ti niyaajatiib aa nan nyi ti na. U nan cha falaa pii nimi ke u ŋaŋ nimi; nima kan, naadoon na, ni yaa nan nyaŋ kan, u ga ŋa tinyoor ŋa ni pu.

¹⁷ Nima pu na, ni taa dak ke nimi aapɔɔn pu le cha ni ŋa biwankpadam.

¹⁸ Ni teer ke Nidindaan Uwumbɔr le ŋa nimi biwankpadam; waah nan puu tipuur ti tii niyaajatiib na, le u beenin joo ti, ki ŋa kina.

¹⁹ Ni taa suln Nidindaan Uwumbɔr bɔr aan ki fenn dii ŋiwaa, ki dooni ŋi, ki tun tii ŋi. Mbamɔn le m tuk nimi din wee na, ni yaa ŋa kina kan, u ga kuln nimi.

²⁰ Ni yaa kaa kii Uwumbɔr aamɔb kan, ni li nyi ke u ga kuln nimi, ke waah ban u kuln ŋinibol ŋi ni bi tur koo baatiŋ ni na pu na.