Ikaal 7 - Uwumbɔr aagbaŋ

Uwumbɔr aanib

¹ “Nidindaan Uwumbɔr le ga di nimi koon kitiŋ ki ni cha ni ti gaa ki na ponn ni. Le ni yaa tur koo ki ponn ni kan, u ga jenn nyan ŋinibol pam. U ga jenn nyan Hef yaab, ni Girgas yaab, ni Amor yaab, ni Kanaann yaab, ni Peris yaab, ni Hif yaab, ni Jebus yaab. Ŋinibol ŋilole ngbaan wiir, ki kpa mpɔɔn jer nimi.

² N‑yoonn mu Nidindaan Uwumbɔr ti di binib ngbaan ŋa nimi aapɔɔn ni, aan ni nyaŋ bi na kan, ni ku doo bi kookoo. Ni taa ŋa bi nimaantɔtiib, ki taa li san bi kinimbaak.

³ Ni taa yoor bibisatiib, ki taa cha nijapɔtiib mu yoor bi ponn ni aapiibim.

⁴ Ba pu? ni yaa ŋa kina kan, bi ga cha nimi aabim yii Uwumbɔr, le ki dooni ŋiwaa. Ni yaa ŋa kina kan, Uwumbɔr aaŋuul ga fii ni pu, le u kuln nimi doo.

⁵ Nima pu na, ni gbaa wii baawaa aatork aabimbin, ki gbaa wii baatakpal aawaa ŋi fɔk ke jaatɔlk na yuk yuk, ki gaa baapiiwaal li bi yin li ke Asera na aawaachur lii, ki see baawaa mɔmɔk mmii.

⁶ Naah ye Nidindaan Uwumbɔr aanib pu na, ni ŋa kina. Nimi le u nyan dulnyaa aanib mɔmɔk ni, ke ni li ye uma ubaa aanib.

⁷ “Naa ye ke ni wiir le jer binib biken, nima le cha Uwumbɔr gee nimi ki nyan nimi ŋinibol mɔmɔk ni; nimi le par, kaa wiir dulnyaa wee ni.

⁸ Uwumbɔr tee gee nimi, le ki ban ke u li joo tipuur ti u nan puu tii niyaajatiib na. Nima pu le u di waapɔɔn sakpiin na nyan nimi tinaagbiir ni, ki gaa nimi lii Ijipt yaab aabɔr chee.

⁹ Ni teer ke Nidindaan Uwumbɔr baanja le ye Uwumbɔr, le ki ŋani waah len pu na. U ga li joo waah puu tipuur ti na, ki ga mɔk ŋiniker lichur ŋi gee u ki joo waakaal na, waah kpa ngeehm n‑yoonn mɔmɔk pu na,

¹⁰ ki mu ga daa binib bi nan u na aatafal.

¹¹ Nima pu na, maah mɔk nimi pu na, ni li joo mmɔkm ngbaan kina; maah di ikaal i mɔk nimi din wee na, ni li joo i mbamɔm.

Limɔkiir aanyoor

¹² “Ni yaa ŋun ki joo ikaal yee mbamɔm kan, Nidindaan Uwumbɔr ga li beenin joo waah puu tipuur ti na, ki ga mɔk nimi waageehm mu bi n‑yoonn mɔmɔk na, ke waah nan puu pu tii niyaajatiib na.

¹³ U ga li gee nimi ki ŋa tinyoor ŋa ni pu, nima kan, ni ga pɔr kpee, ki li kpa mbim pam. U ga ŋa tinyoor ŋa nimi aasar, ni tijikaar, ni ndaan aasubil, ni olif aakpan pu; u ga ŋa tinyoor ŋa ni pu, ki tii nimi tiwakor pam. U ga ŋa ni pu tinyoor tee mɔmɔk aaboln, kitiŋ ki pu u nan puu tii niyaajatiib ke u ga di tii nimi na.

¹⁴ Binib bibaa aa ki bi dulnyaa wee ni, ki ga kan tinyoor ti aaboln u ga di tii nimi na. Nimi bijab, ni bipiib, ni nimi aawakor mɔmɔk ubaa aan gur kaan li kpa mbim.

¹⁵ Uwumbɔr ga li kii nimi iween mɔmɔk chee, waan cha nkun aaween i aaboln nan lir Ijipt yaab pu na dan ni pu; u ga cha i dan nimi aadim ma pu.

¹⁶ Ni ku ki kuln ŋinibol ŋimɔk Nidindaan Uwumbɔr di ŋa niŋaal ni na, ki taa san bi kinimbaak. Ni taa li dooni baawaa, kina aa ŋan, ŋi ga bii nimi.

¹⁷ “Ni taa len nibaa chee ke ŋinibol ngbaan wiir jer nimi, naan ŋmaa jenn nyan ŋi.

¹⁸ Ni taa li san ŋi ijawaan. Ni teer Nidindaan Uwumbɔr aah nan ŋa Ijipt yaab aabɔr, ni waanib mɔmɔk pu na.

¹⁹ Ni teer tiwanbir ti ninimbigbaŋ nan kan na, ni laasib, ni iwaan aawan, ni mpɔɔn sakpiin mu Nidindaan Uwumbɔr nan di gaa nimi lii na. Waah nan ŋa pu ki bii Ijipt yaab na, u ga ki ŋa kina le ki kuln binib bi ni san bi ijawaan na.

²⁰ U ga cha ijawaan chuu bi; le binib bi san buen mbɔbɔryaan ni na, u ga kuln bi.

²¹ Nima pu na, ni taa li san binib ngbaan ijawaan. Nidindaan Uwumbɔr bi ni chee. U ye Uwumbɔr sakpiin la, le ni ŋan ke ni li san u ijawaan.

²² Naah tur koo ŋinibol ngbaan ponn ni pu na, u ga li jenn nyan ni bi sii sii la. Naan ŋmaa nyaŋ bi nfum mbaa, ni yaa ŋa kina kan, tipeewanbir ti bi na ga pɔr ki li muk nimi.

²³ Uwumbɔr ga di nimi aadim ŋa nimi aaŋaal ni, ki cha ijawaan chuu bi, le ni ti kuln bi doo.

²⁴ U ga di baabɔrb ŋa niŋaal ni, le ni ga ku bi; bi ga suln bibɔr. Ubaa aa bi ki ga ŋmaa kiir nimi, le ni ga kuln bi mɔmɔk.

²⁵ Ni see baawaa mmii. Baah di tikunabr ni salmaa u paan ŋi pu na, ni taa li neen ŋi, ki taa yoor ŋi. Ni yaa ŋa kina kan, naan li ŋan, ni ga bii nimi, ba pu? Uwumbɔr aa gee ŋiwaa kpala.

²⁶ Ni taa joo ni ŋiwaa ngbaan ŋibaa nido, ni yaa ŋa kina kan, Uwumbɔr aah ga kuln ŋi pu na, u ga kuln ni mu kina la. Uwumbɔr aah ga kuln ŋiwaa ngbaan pu na, ni mu li nan ŋi, ki yii ŋi.